Nagsirado ang kapin 250 ka pabrika sa sanina sa Bangladesh gikan niadtong milabayng semana atubangan sa pagprotesta sa liboan ka mamumuo dinhi. Miulbo ang kasuko sa mga mamumuo human ang tanyag sa Bangladesh Garment Manufacturers and Exporters Association (BGMEA), kahugpungan sa mga tag-iya sa pabrika, sa mumhong 25% pagtaas sa binulan nga minimum nga suhulan o 10,400 taka ($90) gikan sa kasamtangang 8,300 taka ($75 o ₱4,125). Layo kaayo kini sa ginaduso nilang pagsaka ngadto sa 23,000 taka ($209) nga daw “pinaka-ubos nga minimum” aron mabuhi nila ang ilang mga pamilya. Ulahing nahitabo ang negosasyon aron patas-an ang ilang suhulan niadto pang 2017.

Isip tubag, bangis nga gibungkag sa mga pulis ang mga protesta pinaagi sa tear gas, sound grenade ug shotgun pellets. Duha ka mamumuo ang napatay sa maong brutalidad.