Kalpasan ti 20 aldaw a panagpangta ti “todo-todo a panagsakop” iti Gaza, rinaut ti limitado a tropa ti Zionista nga Israel ti amianan a paset a kadagaan dagiti Palestino idi Oktubre 27. Iti kober ti nalawa a panagbomba a timmarget kadagiti kable ken liya ti komunikasyon, silalastog a simrek dagiti tropa a naglugan kadagiti tangke, buldoser, armored vehicle ken dadduma pay a lugan militar.

Sinabat ida dagiti bomba, pabittak, mortar ken granada dagiti mannakigubat ti Izz ad-Din al-Qassam Brigades, ti armado a takiag ti grupo nga Hamas (Islamic Resistance Movement). Kadagiti kangitingitan a labanan ti tangke laban iti mannakigubat, impakita ti al-Qassam ti nauneg a kaammuan daytoy kadagiti taktika ken ramit Israeli. Segun iti tagapagsarita daytoy a ni Abu Obeida, napabittak ken nawartak ti al-Qassam ti saan a bumaba iti 22 lugan-militar iti umuna pay laeng a 48 oras ti panagsakop. Iti maikadua a gundaway, pinaklaat daytoy ti Israeli Defense Forces (IDF), a kaaduan ket awan ti aktwal a pangkombat a kapadasan. Adu ti napapatay iti IDF, karaman ti kumander ti batalyon dagiti tangke.

Sitatalek ti Hamas a maparmek daytoy ti aniaman a pwersa nga Israeli iti takdang nu sadinno a superyor ti bentahe daytoy iti kadagaan ken suporta a masa. Napartak ken limed a makaakar-akar dagiti mannakigubat daytoy usar ti milya-milya a tunnel wenno sirukan iti sirok ti Gaza. Dagitoy a tunnel ket saan a mawarwartak ti panagbombomba, saan a mabalin a serreken dagiti tangke ken addaan ti bukod a sistema ti komunikasyon a saan a saklaw ti elektroniko a sarbeylans ti Israel.

Ti Hamas ti agar-ari a partido iti Gaza. Produkto daytoy iti umuna nga intifada wenno panagrukuas ti masa idi 1987 ken addaan nasinged a silpo iti dadduma nga Islamiko a grupo iti Middle East. Idi 2006, nabotosan daytoy a mangtarawidwid ti Gaza. Saan na nga inibbatan ti armado a panaglaban kas kangrunaan nga igam laban iti brutal a panagsakop ti Israel. Kadagiti naglabas a tawen, nagpadur-as daytoy iti bukod a pagaramidan ti mortar, rocket-propelled grenade (RPG), lugan a pangbatok, drone ken dadduma pay nga armas.

Katinnulong dagiti operasyon ti Hamas dagiti dadduma nga armado a grupo iti Gaza kas ti Al-Quds Brigade, Islamic Jihad ken Popular Liberation Front of Palestine.

Immun-unan a kinillaat ti al-Qassam ti Zionista nga Israel idi inrussuat daytoy ti Al-Aqsa Flood idi Oktubre 7. Saan a nalapdan, wenno natiktikan man laeng, dagiti abante a sistema ti sarbeylans, drone, ramit-elektroniko, dagiti satelayt ken uray ti inaldaw-aldaw a panangraraut dagiti pwersa nga Israeli daytoy a sorpresa nga atake.

Segun kenni Obeida, imbunga ti operasyon ti mano tawen a panagsagana ken panagsanay, panagadal iti kagagalad ken ramit ti kabusor, ken panangngallilaw ti higante a sistema ti paniktik na daytoy. Planado, napartak, ken nalawag dagiti panggep ti panangatake nga inrussuat manipud iti daga, danum ken uray iti tangatang usar dagiti paraglider.

Kas bales iti pannaka-ibabain a sinagrap ti operasyon, naghuramentado ti Israel. Katinnulong ti US, binulusan daytoy ti pinairteng a kampanya nga henosidyo iti sibilyan a populasyon ti Gaza. Idi Nobyembre 2, addan iti 25,000 tonelada a bomba ti intinnag ti US ken Israel iti Gaza, kabatug ti dua a nuklear a bomba. Awan-anawa ti panangwartak daytoy kadagiti balay, ospital, pagadalan, simbaan, sentro ti ebakwasyon ken dagiti imprastruktura ti danum, kuryente ken telekomunikasyon.

Manipud Oktubre 7, nasuruken 10,000 ti napapatay iti panagbombomba ti Israel, surok 4,100 nga ubbing ken surok 2,600 a babbai. Nasuruken 500 dagiti masaker ti sibubukel a pamilya. Awan ti natalged iti Gaza, target uray dagiti dyornalis ken ambulansya.

Kagiddan ti panagbombomba ti panag-hostage ti Israel kadagiti sibilyan a Palestino. Addan ti 4,000 mangmangged a Palestino ti hinostage daytoy kadagiti kampo militar ti IDF. Dumandanon met iti 1,070 ti arbitraryo a tiniliw iti West Bank ken East Jerusalem. Makasagsagrap da ti nakakaro a tortyur, panangbugbog, panangibabain ken panangpasakit iti ima dagiti soldado ken armado a setler nga Israeli.

Iti bangir ti terorismo ti Israel, nagpablaak ti Hamas a sisasagana da a wayawayaan ti amin a binalud daytoy iti Al-Aqsa Flood babaen iti negosasyon. Iti aktwal, nangwayawaya daytoyen kadagiti babbai, ubbing ken natataengan kadagiti makatao a basaran. Impudno mismo dagiti nawayaan ti nasayaat ken patas a panagtrato kadakuada dagiti mannakigubat.