Naibuyangyang manen iti napalabas nga eleksyon pambarangay ti kinalungsot ti reaksyunaryo nga eleksyon iti Plilipinas. Kas iti naglabas, inaramat daytoy dagiti politikal a dinastiya tapno patibkeren ti bileg da ken agsagana para kadagiti sumarsaruno nga eleksyon.

Manipud Agosto 28 aginggana mismo nga aldaw ti panagbobotos idi Oktubre 30, nasaknap ti kinaranggas ken pangliplipit dagiti politiko kadagiti kalaban da, panaggatang ti botos, pannakibiang ti dadakkel a politiko, apo’t daga ken negosyante, ken pannakibiang ti militar.

Adda laeng iti 32 nga insidente nga addaan kainaigan iti eleksyon ti nairekord ti Commission on Elections (Comelec). Kadagitoy a kaso, 19 katao ti pinapatay kabayatan a 19 katao ti sugatan. Iti report ti ahensya, awan pay 200 a kaso ti panaggatang ti botos. Adayo nga amang daytoy a bilang iti kinapudno.

Nasaknap a ginnatangan ti botos

Sadiay Bukidnon laeng, naireport ti panaggatang ti botos ti amin a 464 barangay ti probinsya. Minilyon a piso a pondo ti inggabur dagiti pulitiko ken negosyante ti probinsya tapno siguraduen ti panangabak dagiti “manok” da. Adda iti ₱700-₱1,000 ti panaggatang ti kada botos para iti kinakapitan.

Suportado dagiti nalungsot a kandidato dagiti notoryus a kriminal karaman ti pamilya Delamace iti Cabanglasan a mangtengtengngel iti tallo a barangay (Freedom, Dalucatan ken Silae). Agtutuon ti krimen ti pamilya kadagiti residente, karaman ti panangbugbog, panagagum ti daga ken panangpapatay kadagiti kalaban da.

Iti ili ti San Fernando, awan ti inaramid nga aksyon dagiti pulis ken soldado iti panagipasaknap ti buteng ni Nonong Salusad, daulo ti paramilitar. Kinikilan na ti P200,000 dagiti timmaray iti kinakapitan iti lima a barangay. Iti Barangay Kibungkog, imbulsa na ti ₱750,000 pondo ti dua a kandidato a kapitan a kalaban ti supsuportaran na.

Iti Sorsogon, nairekord ti ginnatangan ti botos a ₱300-₱1,300 para iti panagkapitan. Adda dagiti kaso nga agpada a taw-an ti mayor ti nagtaray nga agkalaban a kapitan. Kasabwat ti kadadakkelan a pulitiko dagiti soldado ken pulis. Iti met laeng Sorsogon, nagpakat dagiti soldado ti sagga-gaysa nga iskwad kadagiti barangay manipud Oktubre 27. Iti Laguna, nangigabsuon kadagiti soldado manipud iti 1st IB ken dagiti tangke de gera iti ili ti Santa Maria manipud Oktubre 1. Impakat dagiti tropa iti lugar iti linged ti panangpatalinaed ti seguridad iti ili kanaig ti eleksyon a pambarangay.

Atake kadagiti progresibo a kandidato

Kas iti naglabas, target dagiti pwersa ti estado dagiti progresibo ken makabayan a kandidato iti eleksyon a pambarangay.

Iti Batangas, ginandat a lapdan ti 59th IB ti panagkandidato ni Ronald Ramos kas kapitan iti Barangay Macalamcam A, Rosario. Malisyoso nga inakusaran isuna nga adda kainaigan iti rebolusyonaryo a tignayan iti probinsya tapno ikalintegan ti panangikuspil kenkuana.

Iti Bukidnon, dagiti taw-an mismo ti mayor ti ili ti Quezon ti nakibiang ken nangpadakes kadagiti kandidato nga aktibista. Mabuteng ti mayor a mangabak iti poder ti dadduma a progresibo a mabalin a makatinnulong iti pannakidangadang ti umili para kadagiti karbengan da.

Nagpataray met laeng ti National Task Force-Elcac ti dadduma a taw-an daytoy iti Bukidnon. Pinataray ken pinondoan dagitoy dagiti traydor a “simmurender” iti syudad ti Malaybalay ken Valencia. “Kulelat” wenno naabak amin dagitoy.

Agsisinnumbangir ti Red-tagging iti durog dagiti ahente ti estado iti adu a paset ti pagilian. Nairekord dagitoy iti Cebu City, iti Tondo, Manila ken dadduma pay a lugar. Nagiwaras ti polyeto iti agkakabangibang nga ili ti Pavia, Zarraga ken Iloilo City iti Iloilo laban kadagiti nangiyuna kadagiti pannakidangadang a masa kadagiti lugar da.

Laksid kadagiti kaso ti kinaranggas ken panaggatang ti botos, tinubngar ti grupo a Kontra Daya ti panangpadas iti elektroniko a sistema ti eleksyon iti dua a barangay iti Cavite ken maysa iti Quezon City. Segun iti grupo, ti panagusar iti elektroniko a sistema ket mangpakaro laeng iti panagsuitik iti eleksyon gapu ta nalaklaka daytoy a mailemmeng.