Wayawayaan ti Palestine! Surok 600 ti nagprotesta iti embahada ti Israel iti Bonifacio Global City, Taguig City idi Oktubre 31, tapno tubngaren ti okupasyon, awan-sarday a panangbombomba, ken henosidyo ti Zionista a gobyerno ti Israel iti Gaza. Inyun-una ti International League of Peoples’ Struggles (ILPS) ken Bagong Alyansang Makabayan (Bayan) ti protesta. Sakbay daytoy, nagprotesta dagiti Moro sadiay Manila idi Oktubre 26 kas paset ti serye dagiti protesta nga inrussuat iti Bangsamoro iti napalabas a lawas. Naaddaan met laeng ti protesta sadiay Cebu.

Iparang dagiti desaparesidos. Nagummong dagiti pamilya, suporter ken grupo ti karbengan-tao iti Quezon City idi Nobyembre 2 tapno ipanawagan manen ti panangilung-aw kadagiti biktima ti pwersado a panagpukaw ti estado. Iti panagturay ni Marcos Jr, addan 11 a nairekord a desaparesido.

Protesta kontra panagngato-presyo ti petrolyo. Maysa a koordinado a protesta dagiti drayber ken opereytor ti dyip ti insayangkat iti Metro Manila idi Oktubre 24 tapno tubngaren ti panagngato manen ti presyo dagiti produkto a petrolyo iti maika-13 a daras manipud Hulyo. Iti naudi a panagngato, mataytaya a dimmanonen iti ₱19/litro ti innayon iti diesel kabayatan nga agarup ₱14/litro ti innayon iti presyo ti gasolina ken kerosene manipud rugi ti tawen. Naaddaan ti kagiddan a protesta kadagiti syudad ti Baguio ken Cebu, ken iti Iloilo ken Bacolod maysa aldaw sakbay daytoy.

Maiparbeng a kumpensasyon dagiti riders, ited. Ginasut a rider wenno dagiti para-deliber ti kumpanya a Grab ti nagprotesta iti Quezon City idi Oktubre 25 tapno tubngaren ti saan a nainkalintegan a panagkissay ti ₱10 a pastrek da kada deliberi. Gapu iti kissay, ti sigud a ₱45 a minimum a pastrek da kada deliberi ket agbalin a ₱35 laengen. Kinundenar met laeng ti grupo ti panagikkat ti Grab iti siyam nga drayber a limmaok iti asembleya idi Oktubre 19.