Nagserra ti nasurok 250 pabrika ti lupot iti Bangladesh manipud iti napalabas a lawas iti sango ti panagprotesta ti rinibribu a mangmangged ditoy. Pimmutok ti pungtot dagiti mangmangged kalpasan ti awis ti Bangladesh Garment Manufacturers and Exporters Association (BGMEA), timpuyog dagiti makinkua ti pabrika, iti sangkapirrit a 25% a panagngato ti binulan a minimun a sweldo wenno 10,400 taka ($90) manipud iti agdama nga 8,300 taka ($75 wenno ₱4,125). Adayo nga amang iti iruprupir da a panagngato agturong 23,000 taka ($209) a kunada ket “kababaan a minimum” tapno mabiag da dagiti pamilya da. Idi 2017 pay naudi a naadaan ti negosasyon tapno ingato ti sweldo da.

Kas sungbat, naranggas a winara dagiti pulis dagiti protesta babaen ti tear gas, sound grenade ken shotgun pellets. Dua a mangmangged ti napapatay iti daytoy a panangwara.