Nainterbyu ti Ang Bayan ni Kadua Coni Ledesma tapno ammuen ti pannirigan ti Special Office for the Protection of Children ti National Democratic Front of the Philippines kanaig iti kasasaad dagiti ubbing iti Gaza iti tengnga ti awan-anawa ken awan-pilpilien nga atake ti Israel. Segun kadagiti naduma-duma a damag, agbalbalinen a pagipunpunan ti Gaza kadagiti ubbing, nu sadinno ket saan a bumaba iti 40% dagiti napapatay a Palestino, ken dumakdakkel pay, ket dagiti ubbing.

Ang Bayan (AB): Kanaig ti naimpanawenan a pablaak ti NDF SOPC maipanggep iti panagmonitor ken panangsigurado iti karbengan dagiti ubbing iti tengnga dagiti armado a risiris, ania ti takder ti NDFP iti agtultuloy nga okupasyon ken panaglabsing ti karbengan-tao iti Gaza?

Coni Ledesma (CL): Am-amang pay a tumaktakder ti NDFP para kadagiti karbengan ti umili a Palestino para iti kadagaan da. Ti agdama a gubat nga irusrussuat ti Hamas ken umili a Palestino ket gubat para iti nailian a wayawaya.

Ti maspasamak itatta iti Gaza ket genocide. Ti ar-aramiden ti Israel ket agdadata a panaglabsing iti International Humanitarian Law.

Ken ti kakaruan a trahedya ket dagiti ubbing ti kadakkelan a biktima daytoy a gerra. Mataytaya nga adda iti 40% dagiti biktima. Saan pay a karaman ditoy dagiti kaiyanak a maladaga a natnatay iti incubator gapu iti kinaawan langis—langis a saan a palpalubusan ti Israel a makastrek iti Gaza.

Pappapatayen ti gerra iti Gaza ti masakbayan ti umili a Palestino. Ngem nakired ti umili a Palestino. Nasurok 75 tawen dan a makidangdangadang tapno makasubli iti daga da. Mabalin a mapapatay dagiti bomba ti ginasut kadakuada, ngem nasursurok ginasut pay ti bumangon ken itultuloy ti pannakidangadang da.

AB: Ania ti nagpadaan ken nagdumaan ti kasasaad dagiti ubbing iti tengnga ti armado a risiris iti Pilipinas ken Palestine?

CL: Dagiti Palestino ket napatakyas kadagiti dagdaga da. Iti maysa a paset, adda ti nagpadaan daytoy kadagiti Lumad a napwersa a nagbakwit kadagiti dagdaga ken balbalay da gapu iti militarisasyon. Kas kadagiti Palestino, dagiti Lumad ken dagiti dadduma pay nga umili iti kaaw-awayan ket bombombaen. Dagiti Palestino ket biktima ti panangbombomba ti Israel ken dagiti Pilipino iti kaaw-awayan ket bombombaen ti reaksyunaryo a militar.

Ti nagdumaan ket amin dagiti umili ti Gaza ti target ti panangbombomba, istraping ken panagtiliw ti Israel. Ordinaryo nga umili da a winartak ti pagtaengan ken pinapatay dagiti kapamilya. Iti kaso ti Pilipinas, ti target ti (panangbombomba ti) militar ket dagiti umili iti kaaw-awayan nga ak-akusaran a suporter ti New People’s Army, ken saan a dagiti umili nga adda kadagiti syudad.

AB: Ania dagiti addang nga ar-aramiden ti NDFP tapno palataken dagitoy nakakaro ken narurungsot a panaglabsing iti lokal ken internasyunal a tukad?

CL: Nangiruar ti pablaak ti panangkundenar ti NDFP iti agresyon ti Israel. Nangiruar met laeng ti pablaak ti Special Office of the Protection of Children kas panangkundenar iti panangpapatay kadagiti ubbing iti Gaza. Nangiruar met laeng ti manon a pablaak ti PKP kas panangkundenar ti agresyon.

Malaksid kadagitoy, dagiti pwersa ti NDFP iti Pilipinas ken dadduma a pagilian ket lumalaok kadagiti naduma-duma a panagtignay laban iti genocidal war ti Israel.

AB: Ania ti rumbeng nga aramiden dagiti mangsalsalaknib ti karbengan dagiti ubbing, mangsalsalaknib ti karbengan-tao, umili a mangipatpateg iti wayawaya ken dagiti rebolusyonaryo iti Pilipinas ken iti intero a lubong iti sango ti umir-irteng a Zionista a panagatake kadagiti umili ken ubbing a Palestino?

CL: Umuna iti amin, irekrekomendak a maaddaan kadagiti porum ken dadduma pay a saritaan a mangmangted-impormasyon iti publiko mainaig kadagiti gapuanan iti likod ti panagatake ti Israel iti umili a Palestino. Kasapulan a pagtungtungan ti pakasaritaan dagiti Palestino a pinatakyas iti dagdaga da. Adu pay latta ti mamati a ti Israel ti naagrabyado. Saan da nga ammo a dagiti Palestino ket inaguman ti daga a pagnanaedan ken agnanaed itatta iti maysa nga okupado a teritoryo.

Agpampanawaganak met laeng iti amin nga umili a manangipateg iti wayawaya, saan laeng iti Pilipinas nu di iti intero a lubong, a lumaok kadagiti panagtignay nga agpampannawagan iti panangpasardeng iti gerra nga agresyon ti Israel. Ti laeng agkaykaysa a timek ti umili ti lubong ti makapagpasardeng kadaytoy a gerra.