Awan simmangpet A baboy ken nuang nga inkari ti Armed Forces of the Philippines (AFP) ken ti National Task Force-Elcac kadagiti mannalon ken katutubo a minorya kadagiti baryo ti Abra. Segun kadagiti residente, uray buryas ket awan pay naawat da. Dagitoy ket paset ti “suporta nga agrikultural” nga adda pondo manipud iti Support to Barangay Development Program (SBDP) ti NTF-Elcac.

Riri dagiti residente, nasayang laeng ti ginastos da a nagpaaramid ti pagipupokan para kadagiti inkari nga dinguen. Imbes a nuang, sangkabassit a mula laeng ti naited kadakuada. Imbes a baboy, sig-uppat a piyyek ti inted kadagiti residente.

Pinagbalin a nengneng dagiti tao idi nagiwaras ti AFP ti feeds (makan) ti baboy ngem awan pulos naited a taraken a buryas. Nagiwaras met laeng ti NTF-Elcac ti feeds para iti lames idintu nga awan met piskarya wenno fishpond iti lugar, ken awan met naited a fingerlings a mapaadu koma.

Iti probinsya ti Abra, adda ti 28 barangay nga inpauneg ti NTF-Elcac iti proyekto nga SBDP manipud 2021. Inlatangan daytoy ti kumalkalansing a ₱236.7 milyon. Iti kasumbangir na, awan met makitkita kadagiti barangay iti ibagbaga a proyekto a pangkabiagan ken pangkadur-asan a pinoduan dagitoy.

Segun iti New People’s Army (NPA)-Abra, “Ammo ti umili ti probinsya a ti SBDP ket nagbalin a pagbagasan dagiti opisyal ti AFP. Ibulbulsa da ti bilyun-bilyon a pondo na ken awan benepisyo a maidandanon kadagiti barangay.”