Saan a sarsardengan ti al-alya ti pasismo na ken krimen iti sangkataoan ni Rodrigo Duterte. Kagiddan ti panaglukat manen ti ridaw tapno pastreken ti imbestigasyon ti International Criminal Court (ICC) laban kenni Duterte ken iti grupo na, rimmuar ti barbaro nga impormasyon kanaig iti maysa a kaso ti panagmasaker kadagiti Lumad sadiay Agusan del Sur.

Idi Marso 15, 2020, awan an-aniaman a minasaker dagiti tropa ti 88th IB ti lima nga Higaonon iti Sityo Canada, Barangay San Vicente, Esperanza, Agusan del Sur. Karaman kadagiti biktima ti dua a menor-de-edad. Iti testimonya dagiti kabagyan, tiniliw dagiti soldado ni Jellyboy Hagayhay (12), Ryan Lumista (16), Emon Hagayhay (18), Man-apyagan Lumista (19), Nieto Pasandigon (21), ken Pablo Angkamping (40) idi masabat ida asideg ti purok da. Mapan da idi iti sentro ti ili tapno aglako kadagiti produkto da.

Rinimpong ida dagiti pasista ken nagmalem a tinortyur. Karabian na, pinatay dagiti soldado ti lima. Ni laeng Jellyboy ti nagbiag. Ti bangkay dagidiay lima ket imbilleng lattan iti narabaw nga abut ken saan nga impakammo kadagiti pamilya da ti lokasyon da. Makabulan pay ti napalabas sakbay a nasarakan ti pamilya ti nagikalian kadagiti bangkay a nakarimpong pay laeng ken natatek ti tama ti bala.

Ni Jellyboy, a nakaimatang ti brutal a krimen, ket pinagbalin nga hostage iti kampo ti militar sadiay Impasug-ong, Bukidnon. Tallo tawen isuna nga inadipen iti uneg ti kampo. Nagkedked dagiti demonyo a pasista a wayaan ti ubing. Pinangtaan da payen ti nagannak ni Jellyboy.

Idi natakuatan ti krimen, kakuyog ti pangat da ket sinidir ti bumaryo dagiti soldado. Tapno aregluen ken paulimeken dagiti pumurok, pilit nga ipaal-alun-on dagiti soldado ti limos a ₱5,000 kadagiti kabagyan ti minasaker. Awan ti inaramid ti kapitan ti baryo ta isuna mismo ket mabaybayadan nga ahente ti National Task Force-Elcac.

Malaksid pay iti masaker, pinuoran met laeng dagiti puersa ti Special Action forces ti PNP ken Armed Forces of the Philippines (AFP) ti eskuelaan ken amin a balbalay iti Sityo Canada, tallo aldaw kalpasan ti masaker. Dimmapo ti 15 balay iti baryo ken ngan-ngani awan nabati a pagbasaan dagiti Lumad nga imbangon dagiti grupo a relihiyoso ken komunidad. Pinuoran met laeng dagiti soldado dagiti libro, papel ken dadduma a mausar iti eskuelaan.

Saan pay a napnek, pinukan pay dagiti soldado ken pulis dagiti puon ti prutas ken winaknitan ti baryo tapno makababa ti helikopter da. Ni Lt Col Franklin Fabic idi ti kumander ti 88th IB (nga itatta ket koronel ti Unified Command Staff for Intelligence ti AFP WestMinCom).

Manipud 2019, nairekord ti Ang Bayan ti saan a bumaba iti 22 kaso ti panaglabsing iti karbengan-tao, nu sadinno ket maseknan ti 88th IB. Biktima kadagitoy a kaso ti nasurok 3,500 a mannalon ken Lumad.