Manipud Nobyembre 24 aginggana 30, temporaryo nga insardeng ti Israel ti panagbombomba na iti Gaza tapno isayangkat ti “prisoner swap” nu sadinno a winayawayaan ti Hamas ti 105 iti 345 a kinemmeg na iti operasyon nga Al Aqsa Flood kasukat ti 240 iti agarup 10,000 Palestino a nakabalud iti Israel. Karaman kadagiti winayawayaan ti Hamas ti dua a Pilipino a migrante a mangmangged.

Kalpasan ti 6-aldaw a “makatao a pangmabiitan a sardeng-putukan,” pinalubusan manen ti Israel dagiti eroplano a pang-gerra iti Gaza idi Disyembre 1, alas-7 ti bigat iti Palestine. Iti uneg ti simmaruno a 24 oras, dimmanon iti 184 dagiti Palestino a napapatay, 589 ti nasugatan ken 20 balay ti dimmapo kadagiti intinnag a bomba. Sakbay na, nasuroken 15,000 Palestino ti napapatay iti panagbombomba ti Israel. Surok 5,300 kadakuada ket ubbing.

Amin nga eroplano nga us-usaren ti Israel ket manipud iti US ken amin dagiti bomba nga itintinnag na ket dagiti bomba ti Amerikano. Iti kabuklan, 80% kadagiti armas ti Israel ket aramid-US.

Panagpondo iti Zionismo

Pinataud ken pinagtalinaed ti imperyalista nga US ti karasaen a Zionista nga estado ti Israel. Manipud Maikadua a Gerra a Sangalubongan, immawat daytoy ti $146 bilyon, a kadakkelan iti ayuda nga it-ited ti US kadagiti pagilian nga alyado ken mala-kolonya na. Agarup amin dagitoy ket adda iti langa iti ayuda a militar, laksid iti sumagmamano a tao a nagikabil ti ayuda a pang-ekonomya ti US tapno aramiden nga “industriyalisado” ti pagilian.

Tulbek daytoy a ga-higante a pondo iti panagpadur-as iti Zionista a pasista a makinarya. Sakbay nga insayangkat ti Al Aqsa Flood, nu sadinno a naserrek dagiti pwersa a Palestino ti naduma-duma a kampo ken lugar iti Israel, ilaslastog daytoy a “pinaka-sopistikado a militar iti intero a lubong iti tungtungan ti teknolohiya.” Inusar met daytoy nga ayuda tapno ibangon ken padur-asen ti industriya ti armas iti Israel a kasosyo dagiti monopolyo a kumpanya ti armas nga Amerikano. Sumagmamano iti kadadakkelan dagiti kumpanya nga Elbit Systems, Israel Aerospace Industries ken Rafael.

Iti agdama nga henosidyo na iti Gaza, pinasingkedan ti Kongreso ti US ti singasing a sigida a nayonan ti $14.3 bilyon iti sigud a tinawen a $3.3 bilyon nga ayuda militar iti Israel. Daytoy nga ayuda ket adda iti langa dagiti misayl nga Hellfire, 55mm pambala kadagiti kanyon, night-vision, dagiti armas a “bunker-buster” (pangkontra kadagiti tunnel) ken dagiti kabarbaro a lugan militar. Nayon dagitoy iti siguden nga isup-suplay ti US a misayl para iti Iron Dome ken dagiti bomba nga itintinnag dagiti eroplano. Supsuplayan met ti US ti Israel kadagiti kemikal ken bayolohikal a pang-gerra a materyal.

Mataytaya a $48 bilyon ti inggaburen ti Israel iti agdua-bulanen a kampanya ti henosidyo. Tersia iti daytoy a gatad ti binaklay ti US.

Naisangsangayan a papel iti Middle East

Iti kaunggan na, agraraira ti Zionista nga estado ken pasista a makinarya ti Israel tapno pagtalinaeden ti hegemonya ti US iti Middle East. Manipud pay dekada 1980, ingkabil ti US ditoy ti weapon stockpile wenno imbakan ti armas a kadakkelan iti ruar ti bukod a pagilian, kas pangsigurado nga alisto daytoy a maipuesto dagiti armas kas pangarigan gumil-ayab ti aniaman a “pangrehiyon a gulo.” Nakadulin iti uneg ti pagilian ti inawagan a War Reserve Stockpile Allies-Israel wenno WRSA-I a kontrolado ti US. Tinawen, mangikabkabil ti US ti $200 milyon tapno punnuan ti maus-usar kadagiti armas ditoy. Adda kapada nga imbakan iti South Korea ken Japan, ken agsagsagana itatta ti US kadagiti pasilidad iti Pilipinas para kadaytoy.

Idi Oktubre, induron ni Joseph Biden, presidente ti US, nga ikkaten dagiti restriksyon iti panagala ti Israel ti armas iti daytoy nga imbakan tapno nawaya na a mausar dagiti armas ti US iti henosidyo iti Gaza.

Inted ti US iti Israel ti istatus a “mayor nga alyado a di-NATO” ken nairut nga insilpo ti pasista a buyot na iti buyot Amerikano. Manipud 1983, nagtinnulong a pinadur-as ti US ken Israel ti Israel Defense Forces, nga iti aktwal ket maysa a puersa nga opensibo para iti nadara a kampanya a panagsakop kadagiti teritoryo a Palestino.

Agmanmantinar met ti US ti bukod a puersa iti uneg ti Israel, nayon iti rinib-ribu a naka-istasyon iti naduma-duma a pagilian iti Middle East. Idi 2017, inwaragawag ti US ti konstruksyon ti permanente a base nga Amerikano iti uneg ti maysa a kampo militar ti Israel iti disyerto a Negev, a 20 kilometro ti kaadayo na iti Gaza. Dua bulan sakbay ti Al Aqsa Flood, nangigabur ti US ti $35.8 milyon tapno palawaen daytoy a sikreto a base, a tinudingan a “Site 512” ken inawagan a “base iti uneg ti maysa a base.””