Dua a yunit dagiti Nalabbaga a mannakigubat ti New People’s Army (NPA) ti nagturpos iti nagsaruno a panagsanay militar idi Nobyembre kadagiti larangan a gerilya iti Southern Tagalog. Naiyaramid dagiti treyning iti tengnga dagiti focused military operation ti puersa a militar ken pulis kadagiti larangan iti rehiyon.

Bimmayag ti treyning ti 7-10 aldaw. Limmaok ditoy dagiti kangrunaan ken segundaryo nga opisyal ti NPA, dagiti mannakigubat, uray dagiti puersa ti milisyang bayan.

Segun kenni Ka Guillen, opisyal pampulitika iti maysa kadagiti yunit, “Balligi ti panagsanaytayo iti bangir ti nairteng nga operasyon ti kabusor. Naingato tayo ti kabaelan ken pangngeddeng dagiti Nalabbaga a mannakigubat tapno labanan ken parmeken ti nasurdo a kabusor.”

Saklaw ti treyning ti panagadal kadagiti basaran a taktika ken teknika iti indibidwal a panaglaban, panagpamilyarisa kadagiti iggem nga armas aginggana aktwal a panagpaputok kadagiti paltog. Nagtreyning dagiti segundaryo ken kangrunaan nga opisyal iti panagkumand.

Iti panangiyuna dagiti opisyal, sinigurado ti organisado a panagtignay babaen kadagiti maniobra agpada iti opensiba ken depensiba a labanan. Nagun-od met ti panangingato ti tukad ti pigsa ken resistensya ti tunggal maysa a mannakigubat babaen iti inaldaw nga exercise.

Ti panagsanay ket lalo a nagpatibker iti tinnulong ken timpuyog ti tunggal kameng ti yunit iti NPA. Panagleppas ni Ka Guillen, “Masigurado tayo a lallalo a mapatibker ti panagkaykaysa tayo bayat a koordinado tayo nga umad-addang paabante iti pannakidangadang tayo.”