Iti nabiit, nagsasaruno nga impablaak ti panagpapigsa ti naduma-duma a tsapter ti Kabataang Makabayan (KM) iti sumagmamano a kangrunaan a pribado ken pampubliko a kolehiyo iti Metro Manila. Idi Nobyembre 30, nagirussuat dagitoy ti naduma-duma nga aktibidad tapno rambakan ti maika-59 nga anibersaryo ti organisasyon da.

KM kadagiti kolehiyo

Idi Nobyembre 20, impablaak ti KM-Armando Mendoza ti panangitakder manen ti tsapter da idi Oktubre 10. Nagsasaritaan da ti oryentasyon ken konstitusyon ti KM, pammadayaw ken panangsaludo kadagiti martir, panagplano kadagiti aktibidad ken panagbotos iti baro a komiteng tagapagpaganap. Pinanaganan ti tsapter kenni Armando Mendoza, estudyante ti University of Santo Tomas idi dekada 1970.

“Iti panawen nga agdadata ti basol dagiti reaksyunaryo ken napalalo a panangparigat iti umili a Pilipino, agtaltalinaed a demokratiko a rebolusyon ti umili ti sungbat ti KM,” pablaak ti tsapter.

Iti Polytechnic University of the Philippines (PUP) iti Sta. Mesa, Manila, nagisayangkat ti lightning-rally dagiti kameng ti KM-Balangay Kira Mindoro idi Nobyembre 29. Sakbay pay ti lightning-rally, nagisayangkat ti OP-OD (oplan pinta-oplan dikit) ti tsapter iti uneg ti kampus ken impinta dagiti panawagan nga “Isulong ang digmang bayan!” “KM@59” ken dadduma pay.

Nagisrussuat met ti OP-OD iti uneg ti kampus dagiti tsapter ti KM sadiay University of the Philippines(UP)-Diliman ken UP-Los Baños. Impaskil met ti KM-Eduardo Aquino iti kampus ti UP Manila ti pablaak na iti panangitakder ti tsapter na idi Nobyembre. Naipadamag met ti panagpapigsa manen ti KM iti maysa pay a pribado nga unibersidad ken pampubliko a kolehiyo iti Metro Manila iti maudi a gudua ti tawen.

Isyu dagiti agtutubo

Tulbek ti rebbengen ti KM iti uneg dagiti unibersidad ken pagadalan tapno allukoyen dagiti agtutubo a dalliasaten ti dalan ti demokratiko a rebolusyon ti umili ken iyabante dagiti pannakidangadang a masa. Iti interbyu ti Ang Bayan kenni Rose, kameng ti KM iti maysa nga unibersidad iti Cavite, nakuna na nga agtaltalinaed dagiti kundisyon iti uneg ti eskwelaan da a mangparparigat iti agtutubo kas kanyana. Sumagmamano kano daytoy kadagiti isyu a mangririing iti makabayan a pakinakem ti agtutubo.

“Saan a patas ti it-ited a pondo ti gobyerno para iti basaran a kasapulan dagiti estudyante,” kuna ni Rose. Reklamo da ti nakaro a kinakirang dagiti klasrum ken pasilidad a makaap-apektar iti iskedyul ti klase ken kalidad ti panagisuro.

Nakaro a parigat met iti kas kanyana dagiti babayadan iti unibersidad iti bangir ti libre a matrikula. Nakurang tapno suportaran ti panagbasa na ken panggastos ti pamilya ti ₱15,000 laeng a sapul da kada bulan. Nayon ni Rose, nakaad-adayo ti kasasaad ti panagbasa iti pagilian iti namnamaen na nga naurnos a serbisyo daytoy.

KM agturong buyot ti umili

Dagitoy a problema ken isyu ti nangallukoy kenni Ka Andrea a panawan ti unibersidad ken tumipon iti New People’s Army (NPA).

Istorya na, naimatangan na ti awan panangsungbat kadagiti isyu iti agdama a nalungsot nga sistema ken gubyerno ken dagiti limitasyon ti pannakidangadang iti uneg ti agraraira a sistema. “Aginbibingngeg da (upisyal ti reaksyonaryo nga estado) kadagiti lehitimo a kalikagum ti umili.” Ammo na a babaen ti armado a panaglaban a magun-od ti maysa a gimong a pudno a mangsungbat kadagiti kasapulan ti agtutubo.

Sakbay a naan-anay a nagiggem ti armas, limmaok ni Ka Andrea iti panag-organisa ti KM iti intar dagiti agtutubo a mannalon. “Uray adda ti pangta dagiti kampo militar ken paniktik ti estado iti panag-organisa mi, naballigi mi a naibangon ti tsapter ti KM iti lugar, naannad ken limed ti panagtignay mi.”

Iti uneg ti NPA, nagbalin isuna a nalaing a katinnulong ti yunit iti panagbukel ti tukad-munisipyo a tsapter ti KM iti larangan a pagtigtignayan. Napadar-ay da iti nakuna a panaggu-ummong ti 50 agtutubo manipud iti 12 barangay. “Napun-punno ti namnama ken regta dagiti agtutubo a dimmar-ay. Umuna a kapadasak daytoy ti panagbukel ti dakkel a tsapter ti KM iti nangatngato a tukad,” kunana.