Walay miabot nga baboy ug kabaw nga gisaad sa Armed Forces of the Philippines (AFP) ug sa National Task Force-Elcac sa mga mag-uuma ug nasudnong minorya sa mga barangay sa Abra. Matud sa mga residente, ni baktin wala silay nadawat. Ang maong mga saad kabahin sa “suportang pang-agrikultura” nga adunay pondo gikan sa Support to Barangay Development Program (SBDP) sa NTF-Elcac.

Bwelta sa mga residente, nasayang lamang ang ilang gigasto sa gihimo nilang mga tangkal alang sa gisaad nga pagaalimahang hayop. Imbis nga kabaw, gamay nga tanum lamang ang gihatag. Imbis nga baboy, tig-upat nga piso usab kada residente ang gibaylo.

Gihimong bugok ang mga tawo dihang nanghatag ang AFP og feeds (pagkaon) sa baboy bisan og walay gihatag nga pagaalimahang baktin. Nanghatag usab ang NTF-Elcac og feeds alang sa isda bisan og walay fishpond sa lugar, ug walay gihatag nga similya.

Sa prubinsya sa Abra, adunay 28 ka barangay ang gipailalum sa NTF-Elcac sa proyektong SBDP gikan 2021. Gigahinan kini sa nagtagingting nga ₱236.7 milyon. Luyo niini, dili makita sa mga barangay ang giingong proyekto para sa panginabuhian ug kalambuan.

Matud sa Bagong Hukbong Bayan (BHB)-Abra, “Sayod ang katawhan sa prubinsya nga ang SBDP gipangwartahan sa mga upisyal sa AFP. Gibulsa nila ang binilyong pondo niini ug walay benepisyong nahatag sa mga barangay.”