Bayat a madama ti protesta laban iti iligal nga demolisyon iti 39 a balay idi Nobyembre 28-29, naranggas a tiniliw dagiti puersa ti estado ti pito a kontra-demolisyon nga aktibista ken residente ti Sityo Casia, Barangay Bangkal, Lapu-Lapu City, Cebu. Pinidut dagiti pulis ti uppat a residente a da Marjhun Amoroto, Belt Sasar, Lito Padillon ken Cris Gabutan ken ti lider ti Anakbayan-Cebu a ni Kei Galon, ni Diviemar Opo ti Anakbayan-Lapu-Lapu, ken ni Howell Villacrucis ti AMA-Sugbo-KMU. Winayaan ida kalpasan ti dua aldaw.

Kuna ti grupo, iligal ti inaramid a demolisyon ta awan ti naipakita dagiti pulis nga uray ania a papeles a naggapu korte. Imbutaktak ti dua a grupo nga impudno mismo dagiti awtoridad kadakuada nga “sikreto a demolisyon” ti napasamak gapu ta awan ti ligal a basaran na daytoy.

Idi pay 2006 a nagrugi ti panaglaban ti umili iti Sityo Casia para iti karbengan da a makapagnaed. Ti nakuna a daga ket tagtagikuaen ti pamilya Mangura.

Pammapatay. Natay idi Disyembre 6 ni Banny Tobalado, mannalon iti Sityo Karanawan, Barangay Amuntay, Binalbagan Negros Occidental gapu iti awan an-anawa a panangpaltug ti maysa a platun ti 62nd IB. Rinaut ken pinaltu-paltugan dagiti soldado ti balay na idi alas-5 ti agsapa, a pinaruar da nga “engkuentro.”

Panagdukot. Dinukot dagiti puersa ti estado ni Mar Silos, organisador kadagiti mangngalap ken mannalon, iti Barangay Montecillo, Sariaya, Quezon idi Nobyembre 29. Kameng isu ti Pagkakaisa ng mga Magsasaka at Tagapagtaguyod sa Ikalawang Distrito (PAMATID)-Quezon. Am-ammo isuna kas napinget a mangilablaban iti karbengan dagiti mangngalap ken mannalon sadiay Gitnang Luzon.

Panangpaltug. Awan panangikankano a nagpaputok ti paltug ti 50th IB sadiay Barangay Mataragan, Malibcong, Abra idi Nobyembre 20. Pinaruar ti 50th IB nga adda napasamak nga “engkuentro” iti nasao nga lugar ngem insigida a pinaawan-kinaagpayso na ti New People’s Army (NPA)-Abra. Inuulbod met kano ti ibagbaga ti 50th IB a nakakumpiskar da ti maysa nga MI4, tallo nga M16, maysa a K3 light machine gun, ken dua a bandolyer.