Iti maysa a baryo iti Southern Tagalog, dakkel ti imbingay ti dua a kameng ti Kabataang Makabayan (KM) nga itatta ket agserserbin kas paset ti milisyang bayan. Kabinnulig ida iti panangisigurado ti seguridad dagiti residente ken iti lokal nga yunit ti New People’s Army (NPA) idi nagindeg asideg iti komunidad da.

Naregget, mapamuspusan ken natured da Ka Maki, 23, ken Ka Aja, 21, iti panagakem iti ubra ti milisyang bayan. Dagiti dua ket mangmangged-talon nga inaldaw a sumsumrek kadagiti ka-inyogan ken kataltalonan. Sagpaminsan da met nga agud-udong iti ili tapno agubra iti konstruksyon ken agguardya kadagiti babuyan, manukan, wenno itikan.

Iti maysa a serye ti operasyon dagiti soldado, nagserbi da kas mata ken para-report iti NPA. Regular da nga agrekrekorida kadagiti kabambantayan tapno agkalap ti impormasyon. Isuda met laeng ti agitultulod ti suporta a makan dagiti organisasyon a masa ken sangay ti Partido iti lokalidad para iti NPA.

Iti maysa nga insidente, natured a nagturong ni Ka Maki iti balay ti mannalon nga sigurado na a pagpagnaan dagiti soldado. Pinakalma na ken inammo manipud iti mabutbuteng a mannalon ti detalye dagiti soldado ken nu sadinno ti napanan da. Sigud na nga in-report daytoy iti yunit ti NPA.

Regular met nu agrekorida ni Ka Aja. Katinnulong isuna iti panangpunas kadagiti tugot dagiti Nalabbaga a mannakigubat a dumaldalan wenno agkamkampo iti erya da. Pana-panawen met isuna a pumapa-uneg iti yunit para kadagiti treyning ken panagadal, ken tumultulong iti panagakar-akar dagiti Nalabbaga a mannakigubat. Lalo isuna a nagbalin nga aktibo kalpasan iti naminsan nga inagasan dagiti kakadua.