Rali kontra-pribatisasyon ti PUP. Nagprotesta iti House of Representatives idiay Quezon City dagiti estudyante ti Polytechnic University of the Philippines (PUP) idi Pebrero 12 kagiddan ti panangdengngeg iti National Polytechnic University (NPU) Bill a mangted-dalan iti lallalo a pribatisasyon ken komersyalisasyon ti edukasyon iti unibersidad. Aglalaon kadagiti probisyon ti makuna a gakat a mangipalubos iti panagserrek ti pribado a negosyo iti uneg ti unibersidad. Naranggas a rinakrak dagiti pulis ti protesta dagiti agtutubo.

Black Hearts Day. Nagirussuat ti tinudingan a “Black Hearts Day” dagiti mangmangged pangsalun-at manipud iti pribado ken pampubliko nga ospital idiay Metro Manila ken Baguio City idi Pebrero 14, Aldaw dagiti Puso. Kunada, simbolo ti nangisit a puso ti pannakadismaya da iti rehimen Marcos iti agtultuloy a panangipaidam na kadakuada ti makabiag a sweldo, dagiti naitantan a benepisyo, iti nasaknap a kontraktwalisasyon iti sektor ken dadduma pay a nabayagen a kiddaw dagiti mangmangged pangsalun-at.

Nayon-sweldo, inrupir dagiti unyon ti mannuro idiay NCR. Nagduduma a langa ti sangsangkamaysa a panagtignay ti agtultuloy nga inrussuat dagiti grupo ken unyon dagiti mannuro idiay National Capital Region (NCR) tapno kiddawen ti panangingato ti binulan a sweldo da. Rinugian da ti panagtignay idi Pebrero 14, aldaw dagiti puso, ken nagtultuloy aginggana Pebrero 17 iti panangiyuna ti Alliance of Concerned Teachers-NCR Union.

Risuten ti panagkusit iti eleksyon 2022! Nagturong iti opisina ti Comelec dagiti miembro ti Kontra-Daya, kakuyog ti grupo a TNTrio tapno kiddawen nga unaen ti komisyon ti panagimbestiga iti adun a nakalkal nga anomalya iti eleksyon 2022, ngem iti pagkumikuman ti ubbaw a people’s initiative. Nabayagen nga insumitar dagiti grupo ti arungaing da iti ahensya, ken addan dagiti nakadasar metten a petisyon iti Korte Suprema, tapno imbestigaran ti nasaknap a panagkusit a nangipwesto kenni Ferdinnand Marcos Jr ken Sara Duterte iti poder.

One Billion Rising laban iti kinaranggas iti babbai. Inrussuat dagiti grupo ken organisasyon iti naduma-duma a paset iti pagilian idi Pebrero 14 ti tinawen a sala-protesta nga One Billion Rising (OBR) a kampanya laban iti abuso ken kinaranggas iti babbai. Inyun-una ti grupo a Gabriela, nailian nga alyansa dagiti babbai, ti kangrunaan nga aktibidad ti OBR iti Pilipinas nga inaramid idiay UP-Diliman. Rimmikus ti aktibidad da iti tema a “Rise for Freedom-Be The New World.”