Sa duha ka tuig ni Marcos sa poder, apat ka beses siya nga nagbyahe padulong sa US para makigsinapol sa iya nga amo. Duha sa mga byahe nga ini, pormal niya nga ginpirmahan ang mga kasugtanan militar kon sa diin ginsungka niya ang soberanya kag seguridad sang Pilipinas kabaylo sang suporta militar kag pulitikal sang US sa iya nga paghari. Tuman ang kalipay sang iya amo sa ginsiling sini nga “tuman ka aktibo” ang relasyon sa tunga sang duha ka pungsod sa nagligad nga tuig.

Sadtong Abril 2023, ginpirmahan ni Marcos ang “bilateral defense guidelines” nga ginhanda sang US bilang bag-o nga balayon sang relasyon militar sang duha ka pungsod. Ginbukas niya ang apat ka lokasyon para tukuran sang US sang base militar gamit ang Enhanced Defense Cooperation Agreement (EDCA) kag posible nga walo ka iban pa para sa “indi upisyal” nga mga lokasyon. Unod sang bilateral guidelines ang pagtampok sang daan nga mga gamit kag salakyan-militar sang US sa Pilipinas sa ngalan sang “modernisasyon” sang AFP, pagpadasig sa konstruksyon sang upisyal kag indi upisyal nga mga EDCA site sa ngalan sang pagpakay-o sang mga kampo militar sini, kag mas sagunson kag dalagko nga war games sa tabon sang paghanas sang mga soldado nga Pilipino.

Perme pinulongan ni Marcos subong nga tuig ang pagliso sang AFP sa pagpabaskog sang ikasarang sang pungsod para atubangon ang mga “eksternal nga pamahog.” Ginsuportahan ini sang Archipelagic Island Defense Concept sang AFP, nga nabalay sa estratehiya nga first-island chain sang US para palibutan ang China.

Sugod Marso 2023, ginsugdan ni Marcos kag sang AFP ang pagpadala sang mga kagamitan pang-konstruksyon sa naguot nga barko nga BRP Sierra Madre sa Ayungin Shoal. Supak ini sa masobra 20-tuig na nga hambalanay sa China kon sa diin nagpasalig ang Pilipinas nga indi sini pagkay-uhon ang nagub-an nga barko kag tubig kag pagkaon lang ang dal-on sa mga “supply mission” padulong didto. Imbes nga liwat nga makignegosasyon, ginbalewala ni Marcos ang kasugtangan agud ma-probokar ang China nga maghimo sang tikang nga makapalupok sang gyera, sandig man sa sugo sang US.

Sa byahe ni Marcos sa US sadtong Abril, nagtambong siya sa Trilateral Summit nga ginpatawag sang US kag Japan para labi nga paakigon ang China kag ibukas ang pungsod sa pagbalik sang tropa nga Japanese. Sini nga tuig, ginbukas niya ang Pilipinas sa mga tropa sang US kag mga alyado sini sa NATO sa tuigan nga Balikatan kag iban nga war games, mga joint patrol kag multilateral nga pagtiyog sa kadagatan kag pagpalupad sang mga eroplano pang-gyera kag drone sa SCS. Ginpabay-an sini ang pagtampok sang US sang mga midrange missile nga ginreklamo na sang China kag Russia kag dugang nga nagabutang sa pungsod sa katalagman nga maguyod sa gyera nga ginasindihan sang US.