Sa duha ka tuig ni Marcos sa gahum, upat ka higayon na siyang mibyahe padulong sa US aron makigpulong sa iyang amo. Sa duha sa maong mga biyahe, pormal niyang gipirmahan ang mga kasabutang militar diin iyang gitugyan ang soberanya ug seguridad sa Pilipinas bugti sa suportang militar ug pulitikal sa US sa iyang paghari. Nalipay kaayo ang iyang amo sa gitawag niining “labing aktibo” nga relasyon tali sa duha ka nasud sa miaging tuig.

Niadtong Abril 2023, gipirmahan ni Marcos ang “bilateral defense guidelines” nga giandam sa US isip bag-ong gambalay sa relasyong militar sa duha ka nasud. Iyang giabli ang upat ka lokasyon aron tukuran sa US og base militar gamit ang Enhanced Defense Cooperation Agreement (EDCA) ug posibleng walo pa ka dugang para sa “dili opisyal” nga mga lokasyon. Sulod sa bilateral guidelines mao ang paghan-ok sa karaanng mga gamit ug sakyanan-militar sa US sa Pilipinas sa ngalan sa “modernisasyon” sa AFP, pagpapaspas sa konstruksyon sa upisyal ug dili upisyal nga mga EDCA site sa ngalan sa pag-ayo sa mga kampo militar niini, ug mas kanunay ug dagkung war games sa takuban sa pagbansay sa mga sundalong Pilipino.

Kanunay ginayawit ni Marcos karong tuiga ang pagpaling sa AFP sa pagpalig-on sa kapasidad sa nasud aron atubangon ang mga “eksternal nga hulga.” Gisuportahan kini sa Archipelagic Island Defense Concept sa AFP, nga nakagambalay sa estratehiyang first-island chain sa US aron palibutan ang China.

Gikan sa Marso 2023, gisugdan ni Marcos ug sa AFP ang pagpadala og mga kagamitang pang-konstruksyon sa nabahurang barkong BRP Sierra Madre sa Ayungin Shoal. Supak kini sa kapin 20 ka tuig nang kasabutan sa China diin misaad ang Pilipinas nga dili niini ayuhon ang nabahurang barko, ug tubig ug pagkaon lamang ang dad-on sa mga “supply mission” padulong didto. Imbis nga makignegosasyon pag-usab, giligsan ni Marcos ang maong kahapsay aron hagiton ang China ug itukmod kini nga mohimo sa unang aksyon nga makapaulbo sa gyera, subay sa mando sa US.

Sa biyahe ni Marcos sa US niadtong Abril, mitambong siya sa Trilateral Summit nga gipatawag sa US ug Japan aron labaw pang pasuk-on ang China ug ablihan ang nasud sa pagbalik sa mga tropang Hapon. Karong tuiga, iyang giabli ang Pilipinas sa mga tropa sa US ug mga kaalyado niini sa NATO sa tinuig nga Balikatan ug uban pang war games, mga joint patrol ug multilateral nga paglawig ug pagpalupad og mga eroplanong iggugubat ug drone sa SCS. Gitugutan niini ang paghan-ok sa US og mga midrange missile nga gialmahan na sa China ug Russia ug dugang nga nagbutang sa nasud sa peligrong maangin sa gyera nga ginasugnuran sa US.