Iti dua a tawen ni Marcos iti poder, uppat a daras a nagbyahe agturong iti US tapno makisarita iti amo na. Iti dua kadagitoy a byahe, pormal a pinirmaan na dagiti militar nu sadinno nga insuko na ti soberanya ken seguridad ti Pilipinas kasukat ti suporta a militar ken pulitikal ti US iti panagari na. Nakaragragsak ti amo na a US iti panangawag daytoy a “nakaregregta” ti relasyon iti baet ti dua a pagilyan iti napalabas a tawen.

Idi Abril 2023, pinirmaan ni Marcos ti “bilateral defense guidelines” nga insagana ti US kas baro a balangkas ti relasyon militar ti dua a pagilyan. Inlukat na ti uppat a lokasyon tapno pagitakderan ti US ti base militar usar ti Enhanced Defense Cooperation Agreement (EDCA) ken posible a walo a dadduma pay para kadagiti “saan nga upisyal” a lokasyon. Linaon ti bilateral guidelines ti panangitambak kadagiti daan nga alikamen ken lugan-militar ti US iti Pilipinas iti nagan ti “modernisasyon” ti AFP, panangpapardas iti konstruksyon dagiti upisyal ken saan nga upisyal nga EDCA site iti nagan ti panangtarimaan kadagiti kampo militar daytoy, ken mas masansan ken dadakkel a war games iti linged ti panangsanay kadagiti soldado a Pilipino.

Sangkasao ni Marcos tatta a tawen ti panagbwelta ti AFP iti panangpapigsa ti kabaelan ti pagilyan a sangwen ti “eksternal a pangta.” Sinuportaran daytoy ti Archipelagic Island Defense Concept ti AFP, a nakabalangkas iti estratehiya a first island chain ti US tapno palikmutan ti China.

Manipud Marso 2023, rinugian ni Marcos ken ti AFP ti panangipatulod kadagiti ramit a pangkonstruksyon iti naisadsad a barko a BRP Sierra Madre iti Ayungin Shoal. Kaniwas daytoy iti nasurok 20-tawenen a saritaan iti China nu sadinno a nagkari ti Pilipinas a saan na a tarimaanen ti naisadsad a barko ken danum ken taraon laeng ti maipan kadagiti “supply mission” idiay. Imbes a balbaliw a makinegosasyon, sinalungasing ni Marcos dayta nga urnos tapno pasgedan ti pungtot ti China ken iduron daytoy nga agaramid ti umuna nga aksyon a mangpabettak ti gera, umannurot met laeng iti mandar ti US.

Iti byahe ni Marcos iti US idi Abril, dimmar-ay isuna iti Trilateral Summit nga inpaawag ti US ken Japan tapno ad-adda a pagpungtoten ti China ken ilukat ti pagilyan iti panagsubli dagiti tropa a Hapones. Daytoy a tawen, inbuyangyang na ti Pilipinas kadagiti tropa ti US ken dagiti alyado daytoy iti NATO iti tinawen a Balikatan ken dadduma pay a war games, dagiti joint patrol ken multilateral a panaglayag ken panagpatayab kadagiti eroplano a panggubat ken drone iti South China Sea. Binay-an daytoy ti panangigabsuon ti US kadagiti midrange missile a nangparnuay ti reaksyon ti China ken Russia ken nayon pay a mangikabkabil iti pagilyan iti peggad a maiguyod iti gera nga ar-aronan ti US.