GINKILALA KAG GINPASIDUNGGAN sang rebolusyonaryong kahublagan ang mga namartir nga Pulang hangaway sang Bagong Hukbong Bayan (BHB) sa nahitabo nga mga inaway sa Pantabangan, Nueva Ecija kag sa Tuy, Batangas.

Nagtaliwan ang napulo ka Pulang hangaway kag kumander sang BHB-Central Luzon sa depensiba nga inaway sa 84th IB sa Barangay Malbang, Pantabangan sadtong Hunyo 26.

Ginkilala ang mga namartir nga sila ni Hilario Guiuo (Ka Berting/Tonyo), Harold Menosa (Ka Luzon), Marian Castro (Ka Lunti), Archie Arceta (Ka Soral/Teo), Asaze Galang (Ka Shyla/Cha), Pepito Bautista (Ka Dylan), Noel Bedonia (Ka Eric/Tagumpay), Noel Bedonia Jr (Ka Angel), Reynan Mendoza (Ka Mel), kag Angelika Villalon (Ka Molly). Naghalin sila sa nagkalain-lain nga henerasyon kag sahi, sa kubay sang mga mangunguma, mala-mamumugon, tsuper, tawong-simbahan, kag pamatan-on-estudyante.

Sa Batangas, ginasaludohan sang rebolusyonaryong kahublagan ang paghalad sang kabuhi nila Gladys Cassandra Mendoza (Ka George/Gabriela Saka), Jethro Royce Magtira (Ka Alex) kag Jian Markus Tayco (Ka Reb) sa inaway sa Barangay Bolbok, Tuy sadtong Hunyo 23.

Sa duha ka inaway, maisog nga gin-atubang sang mga martir ang mga kaaway kag lubos ang panindugan nga gin-uyatan ang armas tubtob sa ulihi nga ginhawa.

Ginkundenar man sang mga grupo sa tawhanon nga kinamatarung ang pagtampalas sang mga soldado sa mga bangkay sang mga hangaway. Wala pagtahod nga ginpalapta sang militar sa social media ang mga laragway nga nagapakita sang mga bangkay. Nagapangatubang man sang pagpang-ipit halin sa militar ang mga himata, abyan kag grupo sa tawhanon nga kinamatarung samtang gina-atipan ang pagbawi sa mga bangkay sang napatay.