GIILA UG GIPASIDUNGGAN sa rebolusyonaryong kalihukan ang mga namartir nga Pulang manggugubat sa Bagong Hukbong Bayan (BHB) sa nahitabong mga panagsangka sa Pantabangan, Nueva Ecija ug sa Tuy, Batangas.

Namatay ang napulo ka Pulang manggugubat ug kumander sa BHB-Central Luzon sa depensibong panagsangka batok sa 84th IB sa Barangay Malbang, Pantabangan niadtong Hunyo 26.

Giila ang mga namartir nga si Hilario Guiuo (Ka Berting/Tonyo), Harold Menosa (Ka Luzon), Marian Castro (Ka Lunti), Archie Arceta (Ka Soral/Teo), Asaze Galang (Ka Shyla/Cha), Pepito Bautista (Ka Dylan), Noel Bedonia (Ka Eric/Tagumpay), Noel Bedonia Jr (Ka Angel), Reynan Mendoza (Ka Mel), ug Angelika Villalon (Ka Molly). Naggikan sila sa nagkalain-laing henerasyon ug hut-ong, sa han-ay sa mga mag-uuma, semi-proletaryo, drayber, tawong simbahan, ug kabatan-onang estudyante.

Sa Batangas, gipasidunggan sa rebolusyonaryong kalihukan ang paghalad og kinabuhi nilang Gladys Cassandra Mendoza (Ka George/Gabriela Saka), Jethro Royce Magtira (Ka Alex) ug Jian Markus Tayco (Ka Reb) sa panagsangka sa Barangay Bolbok, Tuy niadtong Hunyo 23.

Sa duha ka panagsangka, maisugong giatubang sa mga martir ang mga kaaway ug hugot nga gihuptan ang ilang armas hangtud sa katapusan.

Gikundena usab sa mga grupo sa tawhanong katungod ang pagyatak sa mga sundalo sa mga patayng lawas sa mga manggugubat. Walay pagtahod nga gipakaylap sa militar sa social media ang mga hulagway nga nagpakita sa mga patayng lawas. Nakasinati usab og pagpanghasi gikan sa militar ang mga paryente, higala ug grupo sa tawhanong katungod samtang giatiman ang pagkuha sa mga patayng lawas.