BINIGBIG KEN PINADAYAWAN ti rebolusyonaryo a tignay dagiti namartir a Nalabbaga a mannakigubat ti New People’s Army (NPA) kadagiti napasamak a rinnupak iti Pantabangan, Nueva Ecija ken iti Tuy, Batangas.

Pimmusay ti sangapulo a Nalabbaga a mannakigubat ken kumander ti NPA-Central Luzon iti depensibo a labanan iti 84th IB iti Barangay Malbang, Pantabangan idi Hunyo 26.

Nabigbig dagiti namartir a da Hilario Guiuo (Ka Berting/ Tonyo), Harold Menosa (Ka Luzon), Marian Castro (Ka Lunti), Archie Arceta (Ka Soral/Teo), Asaze Galang (Ka Shyla/Cha), Pepito Bautista (Ka Dylan), Noel Bedonia (Ka Eric/Tagumpay), Noel Bedonia Jr (Ka Angel), Reynan Mendoza (Ka Mel) ken Angelika Villalon (Ka Molly). Nagtaud da iti nadumaduma a henerasyon ken dasig, iti intar ti mannalon, mala-mangmangged, tsuper, tao ti simbaan ken kabataan-estudyante.

Idiay Batangas, pinadayawan ti rebolusyonaryo a tignay ti panagbuwis ti biag da Gladys Cassandra Mendoza (Ka George/ Gabriela Saka), Jethro Royce Magtira (Ka Alex) ken Jian Markus Tayco (Ka Reb) iti labanan idiay Barangay Bolbok, Tuy idi Hunyo 23.

Iti dua a labanan, natured a sinango dagiti martir dagiti kabusor ken sibubukel ti pangngeddeng da a nangiggem ti armas agingga iti maudi nga anges da.

Kinundenar met dagiti grupo ti karbengan-tao ti panangbastos dagiti soldado kadagiti bangkay dagiti mannakigubat. Awanan-bain nga ipaspasaknap ti militar iti social media dagiti ladawan a mangiparparang kadagiti bangkay. Nakapadas met ti pananglipit militar dagiti kapamilya, gagayyem ken grupo iti karbengan-tao bayat matamtaming ti panangala iti bangkay dagiti pimmusay.