Padayon nga nagkagrabe ang teroristang kampanya sa pagpanumpo sa rehimeng US-Marcos ug kakunsaba nga mga agalong yutaan batok sa masang mag-uuma sa kabanikanhan. Sa milabayng mga semana, nataho ang kaso sa pagpatay sa mga mag-uuma sa Masbate, pag-aresto sa Palawan, ug pagpangilog og yuta ug pagpalayas sa Bataan, Cavite, Laguna, Cebu, ug Iloilo.

Pagpatay. Duha ka mag-uuma ang gipatay sa mga sundalo sa 2nd IB sa Purok 3, Barangay Simawa, Uson, Masbate niadtong Setyembre 26. Ang gipatay nga silang Roger Clores ug Ronnel Abril ang ika-34 ug ika-35 nga biktima sa pagpamatay sa 2nd IB sa prubinsya.

Gipanghimakak sa lumulupyo ang gipagawas sa militar nga napatay ang duha sa usa ka engkwentro, kung asa nakakumpiska pa kuno og lain-laing klase sa mga pusil. Gipamatud-an nilang silingan nila si Clores ug sa Abril.

Pag-aresto. Iligal nga giaresto si Sefriano Liabres, organisador sa Samahan ng mga Magsasaka at Katutubo ng Mindoro, sa Taytay, Palawan niadtong Oktubre 1. Nagpatambal siya dihang gidagit siya sa mga pulis.

Pagpangilog sa yuta. Pipila ka hugna nga gipabuthan sa mga maton sa Hacienda Borromeo ang mga magbubukid sa Barangay Pandacan, Pinamungahan, Cebu niadtong Setyembre 23. Gisuklan sa mga mag-uuma nga myembro sa Baybay II Farmers Association ang pagpalayas kanila. Pipila ka henerasyon na silang nag-uma sa maong asyenda.

Sa Iloilo, siyam ka pamilyang mag-uuma sa Barangay San Jose, San Miguel ang pugos nga gipalayas sa ilang mga panimalay niadtong Oktubre 2 sa Communities Iloilo Inc, usa ka subsidyaryo sa Vista Land & Lifescapes Inc, kumpanyang gipanag-iyahan sa pamilyang Villar. Nabantog ang mga Villar sa pagpangilog og mga yutang agrikultural ug pagkumbert niini ngadto sa mga subdibisyon.

Sa Laguna, naalarma ang mga mag-uuma nga lumulupyo sa Barangay Casile, Cabuyao sa pagkoral sa Emirates Security Agency ug Santa Rosa Realty Development Corporation, gipanag-iyahan sa mga Yulo, sa 24-ektaryang kayutaan sa barangay niadtong Setyembre 23. Tungod sa pagkural ug pagpanghulga sa mga gwardya, dili maadtuan sa mga mag-uuma ang ilang umahan. Ang pamilyang Yulo ang usa sa pinakadakung agalong yutaan sa prubinsya.

Sa Cavite, kapin 100 ka ginsakpan sa pulis ug militar sa ilalum sa Task Force Ugnay sa 202nd IBde ang subling nagsulay nga mosulod sa Lupang Ramos sa Dasmariñas City niadtong Setyembre 26. Sa wala pa kini, usa ka bulan nang balik-balik nga ginaatake sa mga pwersa sa estado ang maong asyenda aron bungkagon ang panaghiusa sa mga magbubukid.