Padayon nga nagasingki ang terorista nga kampanya sang pagpanumpo sang rehimen US-Marcos kag kakunsabo nga mga agalon mayduta batuk sa masang mangunguma sa kabukiran. Sang nagligad nga mga semana, nalista ang kaso sang pagpatay sa mga mangunguma sa Masbate, pag-aresto sa Palawan, kag pagpang-agaw sang duta kag pagpalayas sa Bataan, Cavite, Laguna, Cebu kag Iloilo.

Pagpatay. Duha ka mangunguma ang ginpatay sang mga soldado sang 2nd IB sa Purok 3, Barangay Simawa, Uson, Masbate sadtong Septyembre 26. Ang ginpatay nga sila ni Roger Clores kag Ronnel Abril ang ika-34 kag ika-35 nga biktima sang pagpamatay sang 2nd IB sa prubinsya.

Ginpanginwala sang tagabaryo ang ginapagwa sang militar nga napatay ang duha sa isa ka engkwentro, kon sa diin nakakumpiskar pa kuno sang nagkalain-lain nga klase sang mga pusil. Ginpamatud-an nila nga kasimaryo nila si Clores kag Abril.

Pag-aresto. Iligal nga gin-aresto si Sefriano Liabres, organisador sang Samahan ng mga Magsasaka at Katutubo ng Mindoro, sa Taytay, Palawan sadtong Oktobre 1. Nagapabulong siya sang gindakop siya sang mga pulis.

Pagpang-agaw sang kadutaan. Pila ka sulit nga ginpalukpan sang mga maton sang Hacienda Borromeo ang mga mangunguma sang Barangay Pandacan, Pinamungahan, Cebu sadtong Septyembre 23. Ginapakigbatuan sang mga mangunguma nga katapo sang Baybay II Farmers Association ang pagpalayas sa ila. Pila ka henerasyon na sila nga nagatalauma sa nasambit nga asyenda.

Sa Iloilo, siyam ka pamilya nga mangunguma sa Barangay San Jose, San Miguel ang pwersahan nga ginpalayas sa ila mga puluy-an sadtong Oktobre 2 sang Communities Iloilo Inc, isa ka subsidaryo sang Vista Land & Lifescapes Inc, kumpanya nga ginapanag-iyahan sang pamilya Villar. Bantog ang mga Villar sa pagpang-agaw sang mga dutang pang-agrikultura kag ginabaylo-gamit sang mga ini padulong sa subdibisyon.

Sa Laguna, nagreklamo ang mga mangunguma nga residente sang Barangay Casile, Cabuyao sa pagpangudal sang Emirates Security Agency kag Santa Rosa Realty Development Corporation, ginapanag-iyahan sang mga Yulo, sa 24-ektarya nga kadutaan sa barangay sadtong Septyembre 23. Tungod sa pagpangudal kag pagpaandam sang mga gwardya, wala nakadtuan sang mga mangunguma ang ila nga mga ulumhan. Ang pamilya Yulo ang isa sa pinakadako nga agalon mayduta sa prubinsya.

Sa Cavite, masobra 100 ka tinawo sang pulis kag militar sa idalom sang Task Force Ugnay sang 202nd IBde ang liwat naghana nga magsulod sa Lupang Ramos sa Dasmariñas City sadtong Setyembre 26. Antes sini, isa ka bulan na nga pila ka sulit nga gina-atake sang mga pwersa sang estado ang nasambit nga asyenda para bungkagon ang paghiliugyon sang mga mangunguma.