Pormal nga gianunsyo sa Koalisyong Makabayan sa nasudnong kumbensyon niini sa San Andres Sports Complex sa Maynila niadtong Setyembre 28 ang ilang plataporma, mga kandidato pagkasenador ug mga nominado sa mga partidong modagan sa eleksyong party-list. Halos napuno sa kapin 3,000 ka mga tigsuporta ug myembro sa koalisyon ang benyu.

Sa pamulong ni Ka Paeng Mariano, lider-mag-uuma ug usa sa mga tigpangulo sa koalisyon, gipaambit niya motuyok ang kampanya sa Makabayan sa pagpasiugda sa pakigbisog alang sa nasudnong demokrasya para sa hinanaling alibyu sa katawhan ug kaugalingnan sa nasud.

Sayod ang koalisyon sa reyalidad nga ang eleksyon gidominahan sa mga dinastiya sa pulitika ug tradisyunal nga pulitiko (trapo) nga nagarepresenta sa interes sa mga oligarkiya, agalong yutaan, ug mga langyawng tigpangawkaw.

Magpadagan kini og 11 ka kandidato pagkasenador ug upat ka mga progresibong party-list nga nagarepresenta sa kababayen-an, magtutudlo, kabatan-onan ug ubang demokratikong sektor.

Ang mga kandidato sa koalisyon sa pagkasenador mao silang Teacher France Castro, Rep. Arlene Brosas, Jerome Adonis, Liza Maza, Ronnel Arambulo, Teddy Casiño, Danilo Ramos, Jocelyn Andamo, Mody Floranda, Mimi Doringo, ug Amirah Lidasan. Pangunahan usab ni Atty. Neri Colmenares ang Bayan Muna Party-list, ni kanhing Rep. Sarah Elago ang Gabriela Women’s Party, ni kanhing Rep. Antonio Tinio ang ACT Teachers Party-list ug Atty. Renee Co ang Kabataan Party-list.

Sa kumbensyon, naghatag og mensahe sa pakighiusa ang kandidato sa pagkasenador nga si Francis “Kiko” Pangilinan. Nagpadayag usab sa tibuok suporta sa mga kandidato sa koalisyon ang bag-ong tukod na Health Workers Party-list. Unang nominado sa partido si Robert Mendoza, usa ka kumadrona ug nasudnong pangulo sa Alliance of Health Workers.

Ang kumbensyon pormal nga gitak-op nilang Ka Satur Ocampo, usa sa mga haligi sa koalisyon ug nagabarog nga president emeritus niini, ug ni Rep. Raoul Manuel, usa sa mga bag-ong napili nga lider sa Makabayan.

Nagsumite og sertipiko sa kandidatura ang mga kandidato pagkasenador sa Makabayan niadtong Oktubre 4.

Pagpadagan sa lokal. Magpadagan usab og pipila ka kandidato ang koalisyon sa ang-ang lokal. Niadtong Setyembre 30, gianunsyo sa Koalisyong Makabayan-National Capital Region (NCR) ang unum ka kandidato niini sa pagkakonsehal sa Caloocan District 1, Marikina District 2, Valenzuela District 2, Muntinlupa District 1, ug Taguig District 1. Gipaila-ila sila sa rehiyonal nga asembliya sa Sta. Mesa, Manila.

Matud sa Makabayan-NCR, ang eleksyong 2025 usa ka higayon para hatagag duut ang mga isyu sa katawhan ug sa mga demokratikong sektor sa rehiyon. “Mula Senado hanggang konseho, taumbayan ipanalo!” (Gikan Senado hangtud konseho, katawhan padaugon!) ang panawagan sa grupo.

Kandidato sa mga Marcos ug Duterte

Sukwahi sa kandidato sa Makabayan, gipaila-ila sa rehimeng Marcos ang mga manok niini sa senado sa umalabot nga eleksyong 2025 sa gilunsad nga pulitikanhong panagtapok niadtong Setyembre 26 sa Pasay City. Lakip sa 12 ka kandidato pagkasenador sa administrasyon ang mga iladong agalong yutaan, burgesyang kumprador, ug burukratang kapitalista gikan sa mga dinastiya sa pulitika.

Ang mga manok ni Marcos nakapailalim sa bag-ong tukod nga “Alyansa para sa Bagong Pilipinas” nga gilangkuban sa lima ka partido. Nag-usa ang Partido Federal ng Pilipinas (PFP), Lakas-Christian Muslim Democrats (CMD), Nationalist People’s Coalition (NPC), Nacionalista Party (NP) ug National Unity Party (NUP) aron tukuron ang dautang koalisyon.

Gipakita sa alyansa ang nagkahiusang pagyuko kang Marcos sa pipila ka pulitikanhong partido, apan gidahum na sa PKP nga dali ra usab kining mabungkag sama sa “uni-team” ni Marcos sa mga Duterte niadtong 2022. Pare-pareho silang ginatukmod sa makikaugalingong interes nga makigbahin sa korapsyon ug pribilehiyo, ug sa dili madugay, mag-iya-iya sa paggukod sa tagsa-tagsa nilang interes sa pulitika.

Samtang, magpadagan ang paksyon ni Duterte og dili moubos sa upat ka kandidato sa pagkasenador ilalum sa partido niining PDP-Laban.