Gikan Ilocos hangtud Bicol, pareho ang reklamo sa mga mag-uuma sa pagkainutil ug pagpasagad sa rehimeng Marcos atubangan sa malukpanong kadaut sa agrikultura nga bunga sa magkasunod nga mga katalagman sa nasud.

Sa Bulacan, nakigdayalogo ang mga mag-uuma gikan sa Malolos City, Plaridel ug Calumpit sa National Irrigation Administration niadtong Setyembre 26, para iduso ang hinanali nga pag-ayo sa mga sistema sa irigasyon nga gidaut sa El Niño ug La Niña. Matud nila, ang dili maayong imprastrukturang irigasyon nagbunga sa balik-balik nga pagbaha sa tingtaob o high tide, sobrang pagkadaut sa ilang mga pananum ug pagsulod sa tubig-dagat sa ilang mga umahan.

Matud nila, samtang ginaayo ang imprastruktura isip malungtarong solusyon, kinahanglang hinanali nga maggahin ang gubyerno og gikinahanglang mga gamit, sama sa mga motor pump ug deep well, aron dihadihang sulbaron ang panginahanglan sa produksyon.

Sa Ilocos Norte, mikabat na sa ₱87 milyon ang kadaut sa mga pananum, uban ang dugang ₱385,000 nga nawala sa mga gialimahang hayop tungod sa Bagyong Julian nga miigo niadtong Oktubre 2. Nagarekobir pa lamang ang prubinsya gikan sa sunud-sunod nga epekto sa El Niño ug miaging mga kalamidad, lakip ang pagbaha gikan sa Bagyong Carina ug hanging habagat, nga grabeng nakaapekto sa sektor sa agrikultura.

Ginaduso sa mga mag-uuma dinhi ang ₱25,000 subsidyo alang sa produksyon, ₱15,000 subsidyo para sa mga mangingisda, ug ₱10,000 tabang pinansya para sa tanang naapektuhan sa bagyo ug mga pagbaha.

Sa Bicol, subsidyo ug kumpensasyon usab ang panawagan sa mga mag-uuma gikan sa Libon, Albay ug Nabua ug Bato, sa Camarines Sur. Halos 400 ka ektarya sa humay ang nalubog pa gihapon sa tubig-baha tungod sa magkasunod nga mga bagyo. Mayorya niini pagaanihon na unta niadtong Setyembre. Molungtad ang tubig baha gikan usa hangtud duha ka bulan ayha mohubas, ug miaabot sa hawak ug lapaw sa tawo (mga 6-7 feet). Gibanabanang anaa sa 90-100% ang nadaut nga mga tanum sa mga nabahaan nga humayan. Panawagan sa mga mag-uuma ang paglatag og mga dike, hinabang para sa pagpalit og farm inputs ug kapital alang sa pagpreparar sa yuta ug sa pagtanum.