Usa ka tuig dihang gilunsad sa Zionistang Israel, sa suporta sa imperyalistang US, ang mas gipagrabeng kampanya sa henosidyo batok sa mga Palestino sa Gaza Strip, Palestine, padayon ang maisugong pagsukol sa lain-laing mga organisasyon sa mga Palestino aron pakyason ang pagpangatake ug hingpit nga ilingkawas ang ilang nasud. Armas sa mga Palestino ang armadong pakigbisog, mga kalihukang masa sa lain-laing katawhan sa tibuok kalibutan, pagkigkoopera sa internasyunal nga mga korte ug uban pang mga susamang aksyon.

Armadong pagsukol

Sa milabayng tuig, padayon nga gilunsad sa mga armadong grupong Palestino sa Gaza Strip ang pag-atake sa nagapanulong nga Israeli Defense Forces (IDF). Sa ulahing taho, dili moubos sa 715 ka mga upisyal ug sundalong Israeli, mayorya sakay sa portipikadong mga tangke, ang napatay. Kini nga mga atake gipangunahan sa Izz ad-Din al-Qassam Brigades, ang armadong gaway sa grupong Hamas sa Palestine, sa suporta sa uban pang mga grupo sa Gaza ug okupadong West Bank.

Kini kabahin sa Operation Al-Aqsa Flood nga gisugdan niadtong Oktubre 7, 2023 batok sa terorismo sa Israel. Nagsugod kini sa pagbuhi og halos 5,000 ka misayl nga mitarget sa mga base ug pwersang militar sa Israel. Matud sa Hamas, ang atake usa ka depensibong armadong aksyon nga tugon sa 75 ka tuig nang pag-antus sa ilang katawhan.

Nagagamit ang al-Qassam Brigades og mga taktikang gerilya, kakumbina ang kahanas sa tereyn ug pipila ka abanteng himang iggugubat sama sa nagabusikad nga mga drone ug anti-tank missile, aron ig-on ang mananakop nga pwersa sa Israel sa Gaza Strip.

Isip suporta ug pag-ila sa Palestine, nagalunsad usab og armadong atake ang mga grupo sama sa Houthi sa Yemen, Hezbollah sa Lebanon ug uban pa aron piangan ang katakus ug suportang militar nga nagasulod sa Zionistang Israel.

Ihunong ang henosidyo

Atubangan sa pagpulbos sa Zionistang Israel sa Gaza Strip, midaku ang internasyunal nga suporta sa panawagang ihunong ang henosidyo ug hingpit nga ilingkawas ang Palestine sa pagpanakop. Padayon ang panawagan alang sa hunong-buto aron isalba ang mga sibilyan.

Lakip dinhi ang higanteng mga rali sama sa 300,000 ka demonstrasyon sa United Kingdom niadtong Nobyembre 2023; mga kampuhan sa mga estudyante sa dili moubos sa 130 ka unibersidad sa United States, France, Australia, Japan ug uban pa; ang kampanyang Boycott, Divestment, Sanctions (BDS) batok sa mga korporasyon nga nalambigit sa henosidyo sa Israel ug uban pang tipo sa protesta.

Sa Pilipinas, gilunsad sa mga grupong nasudnon-demokratiko sa pagpanguna sa Bagong Alyansang Makabayan (Bayan) ug Philippines-Palestine Friendship Association ang mga protesta sa pagsuporta sa Palestine ug panawagang tapuson ang henosidyo sa US-Israel dinhi. Niadtong Oktubre 5, subling naglunsad og protesta ang Bayan duul sa embahada sa US aron dumdumon ang usa ka tuig nang henosidyo sa Gaza. Gitukod usab sa daghang bahin sa nasud ang mga network sa mga organisasyong nagasuporta sa Palestine. Giatiman ug gipasilong sa pipila ka mga grupo sa Pilipinas ang mga Pilipino ug Gazan nga napalayas sa Gaza Strip.

Mismong ang International Court of Justice (ICJ), ang nag-unang organo sa hustisya sa United Nations (UN), makapila ka beses nang nagpagula og mga desisyon nga angayang ihunong ang mga pag-atake ug “diha-dihang tangtangon” ang mga pwersang mananakop sa IDF sa mga teritoryo sa Palestine.

Natukmod usab sa brutal nga panghitabo sa Gaza ang UN Security Council nga mag-endorso og usa ka resolusyon niadtong Hunyo 11 para sa inang-ang nga pagpatuman sa hunong-buto sa Gaza. Ang maong plano pekeng giduso sa US aron pahalapon ang kriminal nga tulubagon sa henosidyo. Miani kini og 14 ka boto ug usa ka absteyn.

Kalabot niini, mismong ang Hamas misuporta sa posibleng hunong-buto apan matud nila, kinahanglang nakabase kini sa permanenteng pag-atras sa Israel gikan sa ilang kayutaan. Dayag kining gibalibaran sa Zionistang Israel ug hinunua, labaw pang gipagrabe ang mga pag-atake.