Impeach Sara, gipanawagan. Nagpiket atubangan sa Kongreso niadtong Setyembre 23 ang mga grupong nasudnon-demokratiko aron ipanawagan ang pagtangtang kang Sara Duterte isip bise presidente. Matud sa Bayan, angayan lamang nga palagputon si Duterte tungod sa maanomalya niyang paggasto sa confidential ug intelligence funds nga gitagana sa iyang upisina niadtong milabayng mga tuig. Matud niini, matawag kining “betrayal of public trust” nga mamahimong basehan aron magsumite og impeachment complaint batok kaniya sa Kongreso.

2 ka adlaw nga hunong-pasada batok sa jeepney phaseout, nagmadaugon. Madaugon nga gilunsad sa mga grupong Piston ug Manibela ang duha ka adlaw nga hunong-pasada niadtong Setyembre 23-24 batok sa jeepney phaseout ug alang sa pagbalik sa indibidwal nga prangkisa. Miabot sa 90% ang naparalisa sa mga mayor nga ruta sa Metro Manila sa duha ka magkasunod nga adlaw. Gimuntar sa mga organisasyon sa mga drayber ug opereytor ang 11 ka sentro sa welga ug protesta sa maong mga adlaw.

Aduna usay hunong-pasada ug protesta ang mga grupo sa Calabarzon, Baguio, Bicol, Negros, Panay ug uban pang mga rehiyon. Nanawagan ang mga lokal nga kahugpungan sa nagkadaiyang lokal nga gubyerno ug ahensya nga ibasura ang mga local public transport route plan nga lokal nga bersyon sa PTMP.