Sa pagpanguna sa mga nasudnon-demokratikong organisasyon ug uban pang progresibo, gidumdum sa lain-laing mga sektor ang ika-52 nga anibersaryo sa pagpahamtang ni Ferdinand Marcos Sr sa balaod militar sa mga protesta sulod ug gawas sa nasud. Gipangulohan ang mga protesta sa Bagong Alyansang Makabayan (Bayan).

“Ginadumdum nato karong tuiga ang anibersaryo sa deklarasyon ni Ferdinand Marcos Sr sa balaod militar nga may tumang kasilag sa nagapadayong mga paglapas sa tawhanong katungod, mga katungod sibil ug sa internasyunal nga makitawhanong balaod ilalum sa iyang anak nga si Ferdinand Marcos Jr,” matud sa mga grupo.

“Nagapadayon ang kawalay tulubagon, kakunsaba ang tag-as og ranggo sa pulitika ug ekonomya nga suportado sa gubyernong US.” Matud nila, sama kaniadtong panahon sa balaod militar, ginababagan karon sa mga pasistang makinarya sama sa NTF-Elcac, mga balaod sama sa Anti Terrorism law ug ang nagpakatagbaw nga militar ug pulis ang tinguha sa katawhan alang sa demokrasya, katilingbanong hustisya, tawhanong katungod ug kalinaw.

Adunay mga protesta sa Metro Manila, Laguna, Daraga ug Legazpi City sa Albay, Baguio, Iloilo City ug Capiz sa Panay, Cebu, Bacolod, Tacloban ug Davao. Sa gawas sa nasud, adunay protesta sa siyam ka syudad sa US sa pagpanguna sa Bayan-USA.

Gawas sa mga rali, naglunsad usab og mga film showing, misa, kultural nga pasundayag ug pagdagkot og kandila isip pag-ila sa namartir sa pagbatok sa diktadurya ug pagbalik lantaw sa kalihukang nagpalagpot kang Marcos Sr.