Dili moubos sa 1,200 ka delegado, lakip ang 500 ka indibidwal gikan sa 95 ka nasud ang mitambong sa gilunsad nga kinaunhang “Congreso Mundial contra el Fascismo, el Neofascismo y Expresiones Similares” (Pangkalibutang Kongreso batok sa Pasismo, Neopasismo ug mga Susama) sa Caracas, Venezuela niadtong Setyembre 10-11. Usa sa mga giimbitahan ug mitambong niini ang National Democratic Front of the Philippines (NDFP).

Gikan sa Venezuela, mitambong ang mga katilingbanon ug pulitikanhong lider gikan sa 23 ka estado ug 3,900 ka konseho sa mga komuna (mga lokal nga organo sa pagdumala nga nakabase sa mga organisasyon sa baryo). Lakip usab ang mga organisasyong masa, katilingbanong kalihukan, mga akademiko ug intelektwal, organisador ug mga aktibista gikan sa Latin America, Caribbean, Asia, Africa, Middle East, Europe, United States, ug Canada. Anaa usab ang mga diplomatikong representante sa gubyerno sa Cuba, Nicaragua, Bolivia, People’s Republic of China ug Federal Russian Republic.

“Malipayong gidawat sa NDFP ang imbitasyon sa anti-imperyalistang gubyerno sa Venezuela tungod kay daku ang potensyal nga makaestorya ug mahimamat ang mga gubyerno, kalihukan sa nasudnong pagpalingkawas ug mga organisasyong masa nga nagkigbatok sa imperyalismong US ug mga kaalyado niini nga parehong mga delegado usab sa maong kongreso,” saysay sa representante sa NDFP sa panagtapok. Sa miaging mga tuig, regular nga nakiglambigit ang gubyerno sa Venezuela sa NDFP ug kanunay niining gisiguro nga adunay representante kini sa mga aktibidad nga ginalunsad sa nasud.

Ang pagtambong sa NDFP nagpakita usab ka pakighiusa sa rebolusyonaryong kalihukan sa mga Pilipino sa gubyernong Maduro batok sa padayon nga pag-atake sa imperyalismong US.

Kauban ang Cuba, usa ang Venezuela sa mga nag-unang pwersa sa Latin America nga misukol sa imperyalismong US. Sa dugay nga panahon, napakyas ang imperyalismong US nga patumbahon ang anti-imperyalistang estado niini pinaagi sa mga agresyon sama sa mga pakanang kudeta, asasinasyon, pagpiang sa ekonomiya, ug pagpanghilabot sa mga eleksyon. Gusto sa US nga baligtaron ang nasyunalisasyon sa mga yaweng industriya sa Venezuela, ilabi na ang industriya sa lana. Gusto usab sa US nga tangtangon ang uban pang makamasang palisiya nga gipatuman sa kanhi niining presidente nga si Hugo Chavez, nga gipadayon karon ni Nicolás Maduro. Mahinungdanon ang papel sa gubyernong Maduro sa pagtukod sa usa ka lapad nga nagkahiusang prente batok sa imperyalismong US sa Latin America ug Caribbean.

Gilunsad ang kongreso atubangan sa nagpadayong pakigbisog sa katawhang Venezuelan batok sa interbensyon sa US sa milabayng eleksyon, diin nakadaog si Maduro sa ikatulong higayon. Sa maong pagsukol, subling gipakita sa katawhang Venezuelan ang ilang kalig-on aron panalipdan ang ilang soberanya ug katungod batok sa mga langyawng interbensyon.

“Mayor nga resolusyon sa kongreso ang pagsabot nga ang imperyalismong US ug ang mga alyado niini mao ang komon nga kaaway sa katawhan sa tibuok kalibutan,” matud sa representante sa NDFP. “Nahiusahan dinhi ang panginahanglan alang sa mga gipahimuslan ug dinaugdaug nga katawhan nga suklan ang kalibutanong dagan sa pasismo nga miulbo gikan sa sa krisis sa imperyalismo.”

Gitukod dinhi ang International Anti-Fascist Front nga magsilbing bag-ong kalibutanong alyansa aron motutok sa pabatok pasismo. Tumong niining hiusahon ang mga paningkamot sa lain-laing nasud ug komunidad aron suklan ang hulga sa ekstremistang ideolohiya.

“Usa ka internasyunal nga kampanya batok imperyalistang interbensyon ug pagpanumpo ang pagalunsaron sa mga mitambong,” matud sa representante. “Parehong mapuslanon alang sa mga Venezuelan ug Pilipino ang pagbutyag ug pagbatok sa imperyalismong US. Gawas sa mutwal nga pulitikanhong suporta, mahimo usab nga mapalambo ang ubang porma sa pagtinabangay.”

Samtang anaa sa Venezuela, gibisita sa mga delegado ang mga komuna nga nagdumala sa produksyon sa agrikultura, gamang-kinamot ug uban pang produksyon sa elektronikong mga gadyet. Gipakita dinhi ang katakus sa Venezuela nga ipataas ang lokal na produksyon sa mga produktong pangkonsumo atubangan sa makapiang nga sangsyon sa US ug European Union.

Mainitong gidawat sa daghang Venezuelan ug delegado sa kongreso ang NDFP. “May pipila nga nagpadayag nga bilib sila sa Communist Party of the Philippines,” ingon niya.