Agtultuloy a kumarkaro ti terorista a kampanya ti panangipawil ti rehimen US-Marcos ken dagiti kakunsabo na nga apo’t daga laban iti masa a mannalon iti kaaw-awayan. Kadagiti napalabas a lawas, naimaldit ti kaso ti pammapatay kadagiti mannalon iti Masbate, panag-aresto iti Palawan, ken panagkamkam ti daga ken panagpatalaw idiay Bataan, Cavite, Laguna, Cebu, ken Iloilo.

Pammapatay. Dua a mannalon ti pinatay dagiti soldado ti 2nd IB iti Purok 3, Barangay Simawa, Uson, Masbate idi Setyembre 26. Ti napapatay a da Roger Clores ken Ronnel Abril ti maika-34 ken maika-35 biktima ti pammapatay ti 2nd IB iti prubinsya.

Sinupyat ti bumaryo ti parparwaren ti militar nga inuulbod a ti dua ket napatay iti maysa nga engkwentro, nu sadinno a nakakumpiskar da pay kano ti nadumaduma a klase ti paltog. Pinaneknekan da a kabaryoanda da Clores ken Abril.

Panagaresto. Iligal a naaresto ni Sefriano Liabres, organisador ti Samahan ng mga Magsasaka at Katutubo ng Mindoro, idiay Taytay, Palawan idi Oktubre 1.

Panagkamkam ti daga. Mano a daras a pinaputukan dagiti maton ti Hacienda Borromeo dagiti mannalon ti Barangay Pandacan, Pinamungahan, Cebu idi Setyembre 23. Lablabanan dagiti mannalon a kameng ti Baybay II Farmers Association ti panagpapanaw kadakuada. Manon a henerasyon nga agsuksukay da iti nasao nga asyenda.

Idiay Iloilo, siyam a pamilya a mannalon iti Barangay San Jose, San Miguel, ti pwersado a pinatalaw manipud iti pagtaengan da idi Oktubre 2 ti Communities Iloilo Inc, maysa a subsidyaryo ti Vista Land & Lifescapes Inc, kumpanya a sanikua ti pamilya Villar. Dagiti Villar ket agdindinamag iti panagkamkam kadagiti agrikultural a daga ken panagsukat ti usar dagitoy para kadagiti subdibisyon.

Idiay Laguna, nagriri dagiti mannalon a residente ti Barangay Casile, Cabuyao iti panagalad ti Emirates Security Agency ken Santa Rosa Realty Development Corporation, sanikua dagiti Yulo, iti 24-ektarya a daga iti barangay idi Setyembre 23. Gapu iti panagalad ken panagpangta dagiti gwardiya, saan a makapan dagiti mannalon kadagiti pagmulaan da. Ti pamilya a Yulo ket maysa kadagiti kadakkelan nga apo’t daga iti prubinsya.

Idiay Cavite, nasurok 100 tauhan ti pulis ken militar iti sidong ti Task Force Ugnay ti 202nd IBde ti balbaliw a naggandat a sumrek iti Lupang Ramos iti Dasmariñas City idi Setyembre 26. Sakbay daytoy, makabulanen a mano a daras nga inatake dagiti pwersa ti estado ti nasao nga asyenda tapno dupraken ti panagkaykaysa dagiti mannalon.