Iti panangiyuna dagiti nailyan-demokratiko nga organisasyon ken dadduma pay a progresibo, linagip ti nadumaduma a sektor ti maika-52 anibersaryo ti panangipataw ni Ferdinand Marcos Sr ti linteg militar kadagiti protesta iti uneg ken ruar ti pagilyan. Dagiti tignay ket indauluan ti Bagong Alyansang Makabayan (Bayan).

“Laglagipen tayo tatta a tawen ti anibersaryo ti deklarasyon ni Ferdinand Marcos Sr iti linteg militar kagiddan ti pungtot iti agtultuloy a panaglabsing iti karbengan-tao, dagiti karbengan a sibil ken iti internasyunal a makatao a linteg iti sidong ti anak na a ni Ferdinand Marcos Jr,” segun kadagiti grupo.

“Agtultuloy ti kinadamsak, kakumplot dagiti nabibileg iti pulitika ken ekonomya a suportado ti gubyerno a US.” Kunada, kas idi panawen ti linteg militar, laplapdan tatta dagiti pasista a makinarya kas ti NTF-Elcac, dagiti linteg kas ti Anti Terrorism Law ken dagiti bukatot a militar ken pulis, ti gagem ti umili para iti demokrasya, hustisya iti gimong, karbengan-tao ken kapya.

Naisayangkat dagiti tignay idiay Metro Manila, Laguna, Daraga ken Legazpi City idiay Albay, Baguio, Iloilo City ken Capiz idiay Panay, Cebu, Bacolod, Tacloban ken Davao. Iti ballasiw-taaw, naangay dagiti tignay iti siyam a syudad iti US iti panangiyuna ti Bayan-USA.

Malaksid kadagiti rali, adda met dagiti film showing, misa, kultural a pabuya ken panagsindi ti kandila kas panangbigbig kadagiti namartir iti laban iti diktadura ken panangsubli iti tignay a nangpadisi ken Marcos Sr.