Sa pagpanguna sang mga pungsodnon-demokratiko nga organisasyon kag iban pa nga progresibo, gindumdom sang nagkalain-lain nga mga sektor ang ika-52 nga anibersaryo sang pagpatuman ni Ferdinand Marcos Sr sang laye militar sa mga protesta sa sulod kag gwa sang pungsod. Ginpamunuan ang mga hublag sang Bagong Alyansang Makabayan (Bayan).

“Ginadumdom naton subong nga tuig ang anibersaryo sang deklarasyon ni Ferdinand Marcos Sr sang laye militar nga may kadungan nga kaakig sa nagapadayon nga mga paglapas sa tawhanon nga kinamatarung, mga kinamatarung sibil kag sa internasyunal nga makitawhanon nga laye sa idalom sang iya bata nga si Ferdinand Marcos Jr,” suno sa mga grupo.

“Nagapadayon ang patarasak, kakunsabo ang mga matag-as sa pulitika kag ekonomiya nga suportado sang gubyernong US.” Suno sa ila, pareho sadtong panahon sang laye militar, ginapunggan subong sang mga pasista nga makinarya pareho sang NTF-Elcac, mga laye pareho sang Anti Terrorism Law kag ang tuman ka busog nga militar kag pulis ang handum sang pumuluyo para sa demokrasya, pangkatilingban nga hustisya, tawhanon nga kinamatarung kag kalinong.

May yara sang mga hublag sa Metro Manila, Laguna, Daraga kag Legazpi City sa Albay, Baguio, Iloilo City kag Capiz sa Panay, Cebu, Bacolod, Tacloban kag Davao. Sa gwa sang pungsod, may yara sang mga hublag sa siyam ka syudad sa US sa pagpanguna sang Bayan.

Magluwas sa mga rali, may yara sang mag film showing, misa, kultural nga pasundayag kag pagsindi sang kandila bilang pagkilala sa namartir sa awayan sa diktadurya kag pagbalik tan-aw sa kahublagan nga nagpahalin kay Marcos Sr.