Pormal nga gin-anunsyo sang koalisyon nga Makabayan sa pungsodnon nga kumbensyon sini sa San Andres Sports Complex sa Manila sadtong Septyembre 28 ang ila plataporma, mga kandidato pagka-senador kag mga nominado sang mga partido nga magapadalagan sa eleksyon sang party-list. Halos napuno sang masobra 3,000 ka mga tigsuporta kag katapo sang koalisyon ang benyu.

Sa pamulong-pulong ni Ka Paeng Mariano, lider-mangunguma kag isa sa mga nagapangulo sang koalisyon, ginpaambit niya nga magatiyog ang kampanya sang Makabayan sa pagtib-ong sang paghimakas para sa pungsodnon nga demokrasya para sa gilayon nga kasulhayan sang pumuluyo kag independensya sang pungsod.

Kahibalo ang Koalisyon sang reyalidad nga ang piniliay ang dominado sang mga tradisyunal nga pulitiko nga nagatiglawas sa interes sang mga oligarkiya, agalon mayduta, kag mga dumuluong nga nagpangkawkaw.

Magapadalagan ini sang 11 ka kandidato sa pagka-senador kag apat ka mga progresibo nga party-list nga nagatiglawas sa kababainhan, manunudlo, pamatan-on kag iban pa nga demokratiko nga sektor.

Ang mga kandidato sang koalisyon sa pagka-senador amo sanday Teacher France Castro, Rep. Arlene Brosas, Jerome Adonis, Liza Maza, Ronnel Arambulo, Teddy Casiño, Danilo Ramos, Jocelyn Andamo, Mody Floranda, Mimi Doringo, kag Amirah Lidasan. Pagapangunahan naman ni Atty. Neri Colmenares ang Bayan Muna Party-list, ni anay Rep. Sarah Elago ang Gabriela Women’s Party, ni anay Rep. Antonio Tinio ang ACT Teachers Party-list kag Atty. Renee Co ang Kabataan Party-list.

Sa pagtililipon, naghatag sang mensahe sang pakig-ugyon ang kandidato sa pagka-senador nga si Francis “Kiko” Pangilinan. Nagpahayag man sang bug-os nga suporta sa mga kandidato sang koalisyon ang bag-o tukod nga Health Workers Party-list. Una nga nominado sang partido si Robert Mendoza, isa ka kumadrona kag pungsodnon nga pangulo sang Alliance of Health Workers.

Ang kumbensyon ang pormal nga ginsira nila Ka Satur Ocampo, isa sa mga haligi sang koalisyon kag nagatindog nga president emeritus sini, kag Rep. Raoul Manuel, isa sa mga bag-o pinili nga pangulo sang Makabayan.

Naghapag sang sertipiko sang kandidatura ang mga kandidato sa pagka-senador sang Makabayan sadtong Oktobre 4.

Awayan sa lokal. Magapadalagan man sang pila ka kandidato ang koalisyon sa lokal nga lebel. Sadtong Septyembre 30, gin-anunsyo sang Koalisyon nga Makabayan-National Capital Region (NCR) ang anom ka kandidato sini sa pagkakonsehal sa Caloocan District 1, Marikina District 2, Valenzuela District 2, Muntinlupa District 1, kag Taguig District 1. Ginpakilala sila sa pang-rehiyon nga asembliya sa Sta. Mesa, Manila.

Suno sa Makabayan-NCR, kahigayunan ang eleksyon nga 2025 para hatagan tum-ok ang mga isyu pangbanwa sang mga demokratiko nga sektor sa rehiyon. “Halin Senado tubtob konseho, pumuluyo padaugon!” ang panawagan sang grupo.

Kandidato sang mga Marcos kag Duterte

Kabaliskaran sa tiket sang Makabayan, ginpakilala sang rehimen Marcos ang mga manok sini sa senado sa palaabuton nga eleksyon 2025 sa ginlunsar nga pampulitika nga pagtililipon sadtong Septyembre 26 sa Pasay City. Kabahin sa 12 ka kandidato pagka-senador sang administrasyon ang mga kilala nga agalon mayduta, burgesya kumprador, kag burukrata kapitalista halin sa dinastiyang pampulitika. Ang mga manok ni Marcos ang ginpaidalom sa bag-o lunsar nga “Alyansa para sa Bagong Pilipinas” nga ginlakipan sang lima ka partido. Nag-ululupod ang Partido Federal ng Pilipinas (PFP), Lakas-Christian Muslim Democrats (CMD), Nationalist People’s Coalition (NPC), Nacionalista Party (NP) kag National Unity Party (NUP) para tukuron ang kriminal nga koalisyon.

Ginapakita sang alyansa ang naga-isa nga pagduko kay Marcos sang pila ka partidong pampulitika, apang ginalauman sang PKP nga mahapos man ini nga mabungkag pareho sang “uni-team” ni Marcos sa mga Duterte sadtong 2022. Pare-pareho sila nga ginatulod sang maki-kaugalingon nga interes nga maki-partida sa kapuslanan sa korapsyon kag pribilehiyo, kag sa dalayon magmansig-mansig sa paglagas sa tagsa nila ka interes pampulitika. Samtang, magapadalagan ang grupo nga Duterte sang indi magnubo sa apat ka kandidato sa pagka-senador sa idalom sang partido sini nga PDP-Laban.