Pormal nga inyanunsyo ti Koalisyong Makabayan iti nailyan a kumbensyon da iti San Andres Sports Complex idiay Manila idi Setyembre 28 ti plataporma da, dagiti kandidato iti kinasenador ken dagiti nominado dagiti partido a tumaray iti eleksyon a party-list. Dandani mapunno ti nasurok 3,000 a tagasuporta ken kameng ti koalisyon ti benyu.

Iti bitla ni Ka Paeng Mariano, lider-mannalon ken maysa a pangulo ti koalisyon, inbingay na nga agrikus ti kampanya ti Makabayan iti panangitandudo iti dangadang para iti nailyan a demokrasya para iti madagdagus a gin-awa ti umili ken panagwaywayas ti pagilyan.

Ammo ti koalisyon ti kinapudno a ti eleksyon ket dominado dagiti dinastiya iti pulitika ken tradisyunal a pulitiko a mangibagbagi iti interes dagiti oligarkiya, apo’t daga, ken dagiti gangannaet a gamrud.

Mangipataray daytoy ti 11 kandidato iti kinasenador ken uppat a progresibo a party-list a mangibagbagi iti kababaihan, manursuro, agtutubo ken dadduma pay a demokratiko a sektor.

Dagiti kandidato ti koalisyon iti kinasenador ket da Teacher France Castro, Rep. Arlene Brosas, Jerome Adonis, Liza Maza, Ronnel Arambulo, Teddy Casiño, Danilo Ramos, Jocelyn Andamo, Mody Floranda, Mimi Doringo ken Amirah Lidasan. Iyuna met ni Atty. Neri Colmenares ti Bayan Muna Party-list, ni dati a Rep. Sarah Elago ti Gabriela Women’s Party, ni dati a Rep. Antonio Tinio ti ACT Teachers Party-list ken Atty. Renee Co ti Kabataan Party-list.

Iti taripnong, nangted ti mensahe ti pannakikaykaysa ti kandidato ti kinasenador a ni Francis “Kiko” Pangilinan. Nagiyebkas met ti naan-anay a suporta kadagiti kandidato ti koalisyon ti baro a takder a Health Workers Party-list. Umuna a nominado ti partido ni Robert Mendoza, maysa a kumadrona ken nailyan a pangulo ti Alliance of Health Workers.

Ti kumbensyon ket pormal nga inserra da Ka Satur Ocampo, maysa kadagiti adigi ti koalisyon ken tumaktakder a president emeritus ditoy, ken Rep. Raoul Manuel, baro a nabotosan a pangulo ti Makabayan.

Nagidatag ti sertipiko ti kandidatura dagiti kandidato ti kinasenador ti Makabayan idi Oktubre 4.

Laban iti lokal. Mangipataray met ti sumagmamano a kandidato ti koalisyon iti tukad lokal. Idi Setyembre 30, inyanunsyo ti Koalisyong Makabayan-National Capital Region (NCR) ti innem a kandidato da iti kinakonsehal iti Caloocan District 1, Marikina District 2, Valenzuela District 2, Muntinlupa District 1, ken Taguig District 1. Naiyam-ammo da iti pangrehiyon nga asembliya idiay Sta. Mesa, Manila.

Segun iti Makabayan-NCR, gundaway ti eleksyon 2025 tapno maitampok dagiti isyu dagiti demokratiko a sektor iti rehiyon. “Manipud Senado agingga konseho, umili, mangabak!” ti panawagan ti grupo.

Kandidato dagiti Marcos ken Duterte

Kabaliktad iti tiket ti Makabayan, inyam-ammo ti rehimen Marcos dagiti manok na iti senado iti umay nga eleksyon 2025 iti naisayangkat a pulitikal a taripnong idi Setyembre 26 idiay Pasay City. Kabilang iti 12 kandidato iti kinasenador ti administrasyon dagiti mabigbig nga apo’t daga, burges kumprador, ken burukrata kapitalista manipud kadagiti dinastiya iti pulitika.

Dagiti manok ni Marcos ket naipasidong iti baro a ruswat nga “Alyansa para sa Bagong Pilipinas,” a pakaibilangan ti lima a partido. Nagkakadwa ti Partido Federal ng Pilipinas (PFP), Lakas-Christian Muslim Democrats (CMD), Nationalist People’s Coalition (NPC), Nacionalista Party (NP) ken National Unity Party (NUP) tapno buklen ti napeklan a kontra-umili a koalisyon.

Ipakpakita ti koalisyon ti sangsangkamaysa a panagdumog ken Marcos ti sumagmamano a pulitikal a partido, ngem namnamaen ti CPP (Communist Party of the Philippines) a nalaka met laeng a marba daytoy, kas ti “uni-team” ni Marcos kadagiti Duterte idi 2022. Agpapada da nga idurduron ti managimbubukod nga interes a makibingay iti pakinabang iti kunniber ken pribilehiyo, ken iti agangay ket agsisina da iti panagkamat ti tunggal maysa iti bukod na nga interes iti pulitika.

Kabayatan na, mangipataray ti gunglo a Duterte ti saan a bumaba iti uppat a kandidato iti kinasenador iti sidong ti partido da a PDP-Laban.