Impeach Sara, naipanawagan. Nagpiket iti sango ti Kongreso idi Setyembre 23 dagiti grupo a nailyan-demokratiko tapno ipanawagan ti pannakaikkat ni Sara Duterte bilang bise presidente. Segun iti Bayan, rumbeng a padisienen ni Duterte gapu iti naamomalya a panaggastos na iti confidential ken intelligence funds a naited iti upisina na idi napalabas a tawtawen. Segun iti grupo, maibilang daytoy a “betrayal of public trust” wenno panangliput iti talek ti publiko, a mabalin a basaran tapno agidatag ti impeachment complaint laban kenkuana iti Kongreso.

2-aldaw a tigil-pasada laban iti jeepney phaseout, nagballigi. Balligi nga insayangkat dagiti grupo a Piston ken Manibela ti dua nga aldaw a tigil-pasada idi Setyembre 23-24 laban iti jeepney phaseout ken para iti panangisubli ti indibidwal a prangkisa. Dumanon iti 90% ti pannakaparalisa dagiti mayor a ruta ti Metro Manila iti dua nga agsaruno nga aldaw. Inpasdek dagiti timpuyog ti tsuper ken opereytor ti 11 a sentro ti welga ken protesta kadagiti nasao nga aldaw.

Napasamak ti kagiddan a tigil-pasada ken protesta dagiti grupo iti Calabarzon, Baguio, Bicol, Negros, Panay ken dadduma a rehiyon. Nagpanawagan dagiti lokal a timpuyog kadagiti bukod da a lokal a gubyerno ken ahensya nga ibasura dagiti local public transport route plan a lokal a bersyon ti PTMP.