Saan a bumaba iti 1,200 delegado, kabilang ti 500 indibidwal manipud iti 95 pagilyan ti dimmar-ay iti naisayangkat a kaunaan a “Congreso Mundial contra el Fascismo, el Neofascismo y Expresiones Similares” (Sangalubongan a Kongreso laban iti Pasismo, Neopasismo ken dagiti Kapada da) idiay Caracas, Venezuela idi Setyembre 10-11. Maysa kadagiti naimbitaran ditoy ti National Democratic Front of the Philippines (NDFP).

Manipud iti Venezuela, dimmar-ay dagiti sosyo-pulitikal a lider ti 23 estado ti 3,900 konseho dagiti komuna (dagiti lokal nga organo ti panangiwardas a nakabase kadagiti organisasyon iti komunidad). Karaman met dagiti organisasyon ti masa, tignay kagimongan, dagiti akademiko ken intelektwal, organisador ken dagiti aktibista manipud iti Latin America, Carribean, Asia, Africa, Middle East, Europe, United States ken Canada. Adda met idiay dagiti diplomatiko a mangibagi ti gubyerno ti Cuba, Nicaragua, Bolivia, People’s Republic of China ken Federal Russian Republic.

“Naragsak a pinatgan ti NDFP ti imbitasyon ti anti-imperyalista a gubyerno ti Venezuela gapu met laeng iti dakkel a potensyal a makasarita ken makapulapol dagiti gubyerno, nailyan a tignay a mamagwayawaya ken dagiti organisasyon ti masa a lumablaban iti imperyalismo a US, kasta met dagiti kaalyado daytoy a pasig met a delegado iti nasao a kongreso,” istorya ti nangibagi iti NDFP iti taripnong. Iti napalabas a tawtawen, regular a makisilsilpo ti gubyerno ti Venezuela iti NDFP ken kanayon a sigsiguraduen na nga adda ti mangibagi ditoy kadagiti aktibidad a maang-angay iti pagilyan.

Ti idadar-ay ti NDFP ket pannakikaykaysa met ti rebolusyonaryo a tignay a Pilipino iti gubyerno a Maduro laban iti agtultuloy a panagatake ti imperyalismo a US.

Kadwa ti Cuba, maysa ti Venezuela kadagiti kangrunaan a pwersa iti Latin America a lumablaban iti imperyalismo a US. Iti naunday a panawen, napaay ti imperyalismo a US a tumbaen ti anti-imperyalista nga estado kadagiti inruswat na nga agresyon kas kadagiti iskema a kudeta, asasinasyon, dagiti makapilay a sangsyon iti ekonomya ken pannakibiang kadagiti eleksyon. Kalikagum ti US a baliktaden ti nasyunalisasyon dagiti kangrunaan nga industriya ti Venezuela, nangruna ti industriya ti langis. Gagem met ti US nga ikkaten ti dadduma pay a makamasa a patakaran nga inpatungpal ti dati a presidente ditoy a ni Hugo Chavez, a padpadur-asen ti agdama a gubyerno ni Nicolás Maduro. Agak-akem ti napateg a papel ti gubyerno a Maduro iti panangbukel ti maysa a nalawa a nagkaykaysa a prente laban iti imperyalismo a US iti Latin America ken Carribean.

Naangay ti kongreso iti sango ti agtultuloy a panaglaban ti umili a Venezuelan iti pannakibiang ti US iti napalabas nga eleksyon, nu sadinno a nangabak ni Maduro iti maikatlo a gundaway. Iti daytoy a panaglaban, balbaliw nga inpamatmat ti umili a Venezuelan ti kinatibker da tapno ilaban ti soberanya ken karbengan da laban kadagiti gangannaet nga interbensyon.

“Mayor a resolusyon ti kongreso ti panangimtuod a ti imperyalismo a US ken dagiti alyado na ti komun a kabusor ti umili iti intero a lubong,” segun iti mangibagi iti NDFP. “Napagnunumuan ditoy ti pagkasapulan para kadagiti magungundawayan ken maidadanes nga umili a labanan ti sangalubongan a panaguso ti pasismo a gubway ti krisis ti imperyalismo.”

Naitakder ditoy ti International Anti-Fascist Front nga agserserbi a baro a sangalubongan nga alyansa a tumutok iti panaglaban iti pasismo. Panggep daytoy a pagkaykaysaen dagiti gagem ti nadumaduma a pagilyan ken komunidad tapno labanan dagiti pangta dagiti ekstremista nga ideolohiya.

“Maysa nga internasyunal a kampanya laban iti imperyalista nga interbensyon ken panangipawil ti iruswat dagiti dimmar-ay,” segun iti nangibagi. “Mapakinabangan agpada dagiti Venezuelan ken Pilipino ti panangibunannag ken panaglaban iti imperyalismo a US. Malaksid iti mutwal a suporta a pulitikal, mabalin met a mapadur-as pay ti dadduma a porma ti panagtitinnulong.”

Bayat nga adda iti pagilyan, binisita dagiti delegado dagiti komuna a mangiwarwardas iti produksyon iti agrikultura, handikrap ken dadduma pay a produksyon kadagiti elektroniko a gadyet. Naipakita ditoy ti kabaelan ti Venezuela nga ingato ti lokal a produksyon dagiti produkto a pangkonsumo iti sango dagiti makapilay a sangsyon ti US ken European Union.

Nabara a pinasangbay ti adu a Venezuelan ken delegado ti kongreso ti NDFP. “Adda ti sumagmamano a nagiyebkas a bilib da iti Communist Party of the Philippines,” istorya na.