Indi magnubo sa 1,200 delegado, lakip ang 500 indibidwal halin sa 95 ka pungsod ang nagtambong sa ginlunsar nga pinaka-una nga “Congreso Mundial contra el Fascismo, el Neofascismo y Expresiones Similares” (Pangkalibutanon nga Kongreso batuk sa Pasismo, Neopasismo kag mga Kasubong) sa Caracas, Venezuela sadtong Septyembre 10-11. Isa sa mga gin-imbitahan kag nagtambong diri ang National Democratic Front of the Philippines (NDFP).

Halin sa Venezuela, nagtambong ang mga lider pangkatilingban kag pampulitika sang 23 ka estado kag 3,900 ka konseho sang mga komuna (mga lokal nga organo sang pagdumalahan nga nakabase sa mga organisasyon pangkomunidad). Upod man ang mga organisasyon masa, kahublagan pangkatilingban, mga akademiko kag intelektwal, organisador kag mga aktibista halin sa Latin America, Carribean, Asia, Africa, Middle East, Europe, United States, kag Canada. Yara man ang mga diplomatiko nga tiglawas sang gubyerno sang Cuba, Nicaragua, Bolivia, People’s Republic of China kag Federal Russian Republic.

“Malipayon nga gintambungan sang NDFP ang imbitasyon sang anti-imperyalista nga gubyerno sang Venezuela tungod man sa dako nga potensyal nga makahinun-anon kag makasalamuha ang mga gubyerno, pungsodnon nga kahublagan nga mapanghilway kag mga organisasyon masa nga nagabato kontra sa imperyalismong US kag mga kaalyado sini nga lunsay mga delegado man sa nasambit nga kongreso,” panaysayon sang nagtiglawas sang NDFP sa pagtililipon. Sa nagligad nga mga tinuig, regular nga nagapakig-angot ang gubyerno sang Venezuela sa NDFP kag permi sini ginasigurado nga may tiglawas ini sa mga aktibidad nga ginahiwat sa pungsod.

Ang pagtambong sang NDFP ang nagapakita man sang pakig-ugyon sang rebolusyonaryong kahublagan Pilipino sa gubyernong Maduro batuk sa padayon nga pagpang-atake sang imperyalismong US.

Kaupod ang Cuba, isa ang Venezuela sa mga nagapanguna nga pwersa sa Latin America nga nagabato sa imperyalismong US. Sa malawig nga panahon, napaslawan ang imperyalismong US nga pukanon ang anti-imperyalista nga estado sini sa mga ginlunsar sini nga agresyon pareho sang padihot nga kudeta, asasinasyon, makalupog nga sangsyon sa ekonomiya, kag pagpasilabot sa mga eleksyon. Gusto sang US nga baliskaron ang nasyunalisasyon sang mga yabi nga industriya sang Venezuela, nagapanguna ang industriya sang lana. Gusto man sang US nga kakason ang iban pa nga maka-masa nga patakaran nga ginapatuman sang daan sini nga presidente nga si Hugo Chavez, nga ginapauswag sang subong nga gubyerno ni Nicolas Maduro. Nagatungod sang malahalon nga papel ang gubyernong Maduro sa pagtukod sang isa ka malapad nga nagahiliugyon nga prente batuk sa imperyalismong US sa Latin America kag Carribean.

Ginhiwat ang kongreso sa atubang sang nagapadayon nga pagbato sang pumuluyong Venezuelan sa pagpasilabot sang US sa nagligad nga eleksyon, kon sa diin nagdaog si Maduro sa ikatatlo nga higayon. Sa pagbato nga ini, liwat nga ginpakita sang pumuluyong Venezuelan ang ila kapag-on para ipakigbato ang ila soberanya kag kinamatarung batuk sa mga dumuluong nga pagpasilabot.

“Mayor nga resolusyon sang kongreso ang paghangop nga ang imperyalismong US kag ang mga alyado sini ang komun nga kaaway sang pumuluyo sa bilog nga kalibutan,” suno sa tiglawas sang NDFP. “Naugyunan diri ang kakinahanglanon para sa mga ginahimuslan kag ginapigos nga pumuluyo nga batuan ang pangkalibutanon nga sulog sang pasismo nga tuga sang krisis sang imperyalismo.”

Gintukod diri ang International Anti-Fascist Front nga magaserbe nga bag-o nga pangkalibutanon nga alyansa nga magatutok sa pag-away sa pasismo. Katuyuan sini nga isahon ang mga pagtinguha sang nagkalain-lain nga pungsod kag komunidad para batuan ang mga pamahog sang mga ekstremista nga ideolohiya.

“Isa ka internasyunal nga kampanya batuk sa imperyalista nga interbensyon kag pagpanumpo ang ginlunsar sang mga nagtambong,” suno sa tiglawas. “Pareho nga mapuslanon sa mga Venezuelan kag Pilipino ang pagbuyagyag kag pagbato sa imperyalismong US. Magluwas sa mutwal nga suportang pulitikal, mahimo man mapauswag pa ang iban nga porma sang pagbinuligay.”

Samtang yara sa pungsod, ginbisita sang mga delegado ang mga komuna nga nagadumala sa produksyon sa agrikultura, hinimo sa kamot kag iban pa nga produksyon sang elektroniko nga mga gadyet. Ginapakita diri ang ikasarang sang Venezuela nga pataason ang lokal nga produksyon sang mga produktong pangkonsumo sa atubang sang makapiliang nga mga sangsyon sang US kag European Union.

Mainit ang pagbaton sang madamo nga Venezuelan kag delegado sang kongreso sa NDFP. “May pipila nga nagpahayag nga bilib sila sa Communist Party of the Philippines,” panaysaysayon niya.