Makatawen manipud inruswat ti Zionista nga Israel, iti suporta ti imperyalista a US, ti pinainget a kampanya ti henosidyo laban kadagiti Palestino iti Gaza Strip, Palestine, agtultuloy ti nabanwar a panaglaban ti nadumaduma nga organisasyon dagiti Palestino tapno paayen ti panagraut ken aglayon a wayawayaan ti pagilyan da. Armas dagiti Palestino ti armado a dangadang, dagiti tignay masa ti nadumaduma nga umili iti intero a lubong, pannakisilpo kadagiti internasyunal a korte ken dadduma pay a kapada nga aksyon.

Armado a panaglaban

Iti napalabas a tawen, tuloy-tuloy nga insayangkat dagiti armado a grupo a Palestinian iti Gaza Strip ti panagatake iti rumaraut nga Israeli Defense Forces (IDF). Iti maudi a rekord, saan a bumaba iti 715 nga upisyal ken soldado nga Israeli, kaadwan ket nakalugan kadagiti portipikado a tangke, ti napapatay kadagitoy. Dagitoy a panagatake ket iyun-una ti Izz ad-Din al-Qassam Brigades, ti armado a takyag ti grupo a Hamas ti Palestine, iti suporta ti dadduma pay a grupo iti Gaza ken okupado a West Bank.

Dagitoy ket paset ti Operation Al-Aqsa Flood a narugian idi Oktubre 7, 2023 laban iti terorismo ti Israel. Nangrugi daytoy iti panangibulos ti dandani 5,000 misayl a nangpuntirya kadagiti base ken pwersa militar ti Israel. Segun iti Hamas, ti atake ket maysa a depensibo nga armado nga aksyon a sungbat iti 75 a tawenen a panagsagaba ti umili da.

Agar-aramat ti al-Qassam Brigades kadagiti taktika a gerilya, kakumbina ti kaamwan iti tereyn ken sumagmamano nga abante a ramit panggubat kas kadagiti bumbumtak a drone ken anti-tank missile, tapno puntaan ti mannanakop a pwersa ti Israel iti Gaza Strip.

Kas suporta ken panangbigbig iti Palestine, agirusruswat met ti armado nga atake dagiti grupo kas ti Houthi ti Yemen, Hezbollah ti Lebanon ken dadduma pay tapno pilayen ti kabaelan ken suporta a militar a sumsumrek iti Zionista nga Israel.

Isardeng ti henosidyo

Iti sango ti panangpulbos ti Zionista nga Israel iti Gaza Strip, nagbuyat ti internasyunal a suporta iti panawagan nga isardeng ti henosidyo ken naan-anay a ruk-atan ti Palestine iti panagsakop. Tuloy-tuloy ti panawagan para iti panagsardeng ti rinnupak tapno isalbar dagiti sibilyan.

Kabilang ditoy dagiti higante a rali kas ti 300,000 a demonstrasyon idiay United Kingdom idi Nobyembre 2023; dagiti panagkampo dagiti estudyante iti saan a bumaba iti 130 unibersidad iti United States, France, Australia, Japan ken dadduma pay; ti kampanya a Boycott, Divestment, Sanctions (BDS) laban kadagiti korporasyon a karaman iti henosidyo ti Israel ken dadduma pay a tipo ti panagtignay.

Iti Pilipinas, insayangkat dagiti grupo a nailyan-demokratiko iti panangiyuna ti Bagong Alyansang Makabayan (Bayan) ken Philippines-Palestine Friendship Association dagiti protesta ti panagsuporta iti Palestine ken panawagan a gibusan ti henosidyo ti US-Israel ditoy. Idi Oktubre 5, balbaliw a nagiyaramid ti protesta ti Bayan asideg iti embahada ti US tapno lagipen ti makatawenen a henosidyo iti Gaza. Naibangon met iti adu a paset ti pagilyan dagiti network dagiti organisasyon a sumupsuporta iti Palestine. Pinasangbay ken inaywanan ti sumagmamano a grupo dagiti Pilipino ken Gazan a napadisi manipud iti Gaza Strip agturong iti Pilipinas.

Mismo a ti International Court of Justice (ICJ), ti kangrunaan nga organo iti hustisya ti United Nations (UN), ket mano a darasen a nagiruar kadagiti desisyon a rumbeng nga isardeng dagiti panagatake ken “dagus nga ikkaten” dagiti pwersa a mannanakop ti IDF kadagitoy a teritoryo iti Palestine.

Naiduron met ti brutal a paspasamak iti Gaza ti UN Security Council a mangilungalong ti maysa a resolusyon idi Hunyo 11 para iti tukad-tukad a panagipatungpal ti panagsardeng ti rinnupak iti Gaza. Daytoy a plano ket peke nga induron ti US tapno ilinged ti kriminal a responsibilidad na iti henosidyo. Immani daytoy ti 14 a botos iti nadakamat a konseho ken maysa ti saan a pimmosisyon.

Kanaig daytoy, mismo a ti Hamas ket sumupsuporta iti posible a panagsardeng ti rinnupak ngem kunada, kasapulan a nakabatay daytoy iti permanente a panagsanud ti Israel manipud iti daga da. Agdadata a nagkedked ti Zionista nga Israel kadagitoy a basaran, nu di ket ad-adda pay a pakpakarwen na dagiti panagatake.