Isa ka tuig halin sang ginlunsar sang Zionista nga Israel, sa suporta sang imperyalistang US, ang ginpabaskog nga kampanya sang henosidyo batuk sa mga Palestino sa Gaza Strip, Palestine, padayon ang maisog nga pagbato sang nagkalain-lain nga organisasyon sang mga Palestino para paslawon ang pagpanglusob kag lubos nga hilwayon ang ila nga pungsod. Armas sang mga Palestino ang armado nga paghimakas, mga kahublagan masa sang nagkalain-lain nga pumuluyo sa bilog nga kalibutan, pagpakig-angot sa internasyunal nga mga korte kag iban pa nga mga kasubong nga aksyon.

Armado nga pagbato

Sang nagligad nga tuig, tayuyon nga ginlunsar sang mga armado nga grupo nga Palestinian sa Gaza Strip ang pag-atake sa nagalusob nga Israeli Defense Forces (IDF). Sa ulihi nga rekord, indi magnubo sa 715 nga mga upisyal kag soldado nga Israeli, mayoriya sakay sa portipikado nga mga tangke, ang napatay sini. Ang mga pag-atake nga ini ang ginpangunahan sang Izz ad-Din al-Qassam Brigades, ang armado nga butkon sang grupong Hamas sang Palestine, sa suporta sang iban pa nga grupo sa Gaza kag okupado nga West Bank.

Ang mga ini ang kabahin sang Operation Al-Aqsa Flood nga ginsugdan sadtong Oktobre 7, 2023 batuk sa terorismo sang Israel. Nagsugod ini sa pagbuhi sang halos 5,000 ka misayl nga nagtarget sa mga base kag pwersa militar sang Israel. Suno sa Hamas, ang atake ang isa ka depensibo nga armadong aksyon nga sabat sa 75-tuig nga pag-antus sang ila nga pumuluyo.

Nagagamit ang al-Qassam Brigades sang mga taktikang gerilya, ginkumbinar ang ihibalo sa tereyn kag pila ka abanse nga kagamitan pang-gyera pareho sang nagalupok nga drone kag anti-tank missile, para iguon ang manogsakop nga pwersa sang Israel sa Gaza Strip.

Bilang suporta kag pagkilala sa Palestine, naglunsar man sang armado nga atake ang mga grupo pareho sang Houthi sang Yemen, Hezbollah sang Lebanon kag pila ka iban pa para piangon ang ikasarang kag suporta militar nga nagasulod sa Zionistang Israel.

Untaton ang henosidyo

Sa atubang sang pagpulbos sang Zionistang Israel sa Gaza Strip, nagbubo ang internasyunal nga suporta sa panawagan nga untaton ang henosidyo kag lubos nga hilwayon ang Palestine sa pagpanakop. Padayon ang panawagan para sa untat-lupok para luwason ang mga sibilyan.

Kabahin diri ang higante nga mga rali pareho sang 300,000 ka demonstrasyon sa United Kingdom sadtong Nobyembre 2023; mga kampuhan sang mga estudyante sa indi magnubo sa 130 unibersidad sa United States, France, Australia, Japan kag iban pa; ang kampanya nga Boycott, Divestment, Sanctions (BDS) batuk sa mga korporasyon nga may kahilabtanan sa henosidyo sang Israel kag iban pa nga tipo sang hublag.

Sa Pilipinas, ginlunsar sang mga grupo nga pungsodnon-demokratiko sa pagpanguna sang Bagong Alyansang Makabayan (Bayan) kag Philippine-Palestine Friendship Association ang mga protesta sang pagsuporta sa Palestine kag panawagan nga tapuson ang henosidyo sang US-Israel diri. Sadtong Oktobre 5, liwat nga naglunsar sang protesta ang Bayan malapit sa embahada sang US para dumdumon ang isa ka tuig nga henosidyo sa Gaza. Gintukod man sa madamo nga bahin sang pungsod ang mga network sang mga organisasyon nga nagasuporta sa Palestine. Ginsapupo kag ginasagop sang pila ka mga grupo ang mga Pilipino kag Gazan nga natabog halin sa Gaza Strip padulong sa Pilipinas.

Mismo ang International Court of Justice (ICJ), ang nagapanguna nga organo sa hustisya sang United Nations (UN), ang pila ka sulit na nga nagpagwa sang mga desisyon nga dapat untaton ang mga pag-atake kag “gilayon nga kakason” ang mga pwersa nga manogsakop sang IDF sa mga teritoryo nga ini sang Palestine.

Naduso man sang brutal nga panghitabo sa Gaza ang UN Security Council nga mag-endorso sang isa ka resolusyon sadtong Hunyo 11 para sa huluhalintang nga pagpatuman sang untat-lupok sa Gaza. Ang plano nga ini ang peke nga ginduso sang US para panason ang kriminal nga responsibilidad sa henosidyo. Nakakuha ini sang 14 ka boto sa nasambit nga konseho kag isa ka absteyn.

Kaangot sini, mismo ang Hamas ang nagasuporta sa posible nga untat-lupok apang suno sa ila, dapat makatungtong ini sa permanente nga pag-atras sang Israel halin sa ila kadutaan. Direkta ini nga ginpamalibaran sang Zionistang Israel sa mga basehan nga ini kag sa baylo labi pa nga ginapasingki ang mga pag-atake.