Sadtong Oktobre 15, gin-anunsyo sang US nga magapadala ini sang mga sistema nga Terminal High-Altitude Area Defense (THAAD) kag 100 ka Amerikano nga soldado sa Israel, bilang pagpangandam kuno sa potensyal nga atake batuk diri sang Iraq. Ini samtang ginangasal sang ipokrito nga presidente sini nga si Joseph Biden ang “de-escalation” ukon pagpatahaw sang tensyon sa rehiyon nga tuga sang agresyon sang Israel sa Lebanon kag nagapadayon nga henosidyo sini sa Gaza.

Ginpadala sang US ang mga armas para sa Israel sa panahon nga labi pa nangin makangilidlis ang mga krimen sini sa gyera kag krimen batuk sa katawhan sa Gaza, West Bank kag Lebanon. Lakip sa pinaka-ulihi nga makangilidlis nga krimen sini ang pagbomba sa isa ka tent city sang mga bakwit sa Deir al-Balah sa tunga nga bahin sang Gaza Strip sadtong Oktobre 14. Nasunog nga buhi ang indi magnubo sa apat ka pasyente nga ginbalhin sa lugar, pagkatapos napwersa sila nga maghalin sa kalapit nga ospital nga una na nga ginbomba sang Israel. Pila ka oras antes sini, ginbomba sang Israel ang isa ka eskwelahan nga ginapasilongan sang mga bakwit sa naaminhan sang Gaza, kon diin 22 ang napatay, 15 sa ila ang mga bata. Sa Jaballah, ginbombahan sang Israel ang mga Palestino nga nakapila para sa ayuda nga harina. Napulo ang gilayon nga napatay.

Naglab-ot na sa 42,603 ang ginpatay sang Israel sa Gaza, 700 sa West bank samtang 2,309 na ang ginpatay sini sa Lebanon. Sa Lebanon, isa sa pinakagrabe nga krimen ang paghulog sang Israel sang 80 ka bomba sa mga kabalayan nga bahin sang Beirut nga nagpatay sa pangkabilogan nga tiglikom sang grupo sang grupo nga Hezbollah nga si Hassan Nasrallah sadtong Septyemb-re 27. Anom ka bilding ang ginpulbos sang mga bomba kon diin 33 ka iban pa ang napatay. Ang serye sang pagpamomba ang nagpalayas sa 1 milyon na ka tawo, lakip ang 400,000 ka bata. Sadtong Oktobre 1, lubos nga ginlusob sang mga tropa sang Israel ang sur nga bahin sang Lebanon kon diin gin-away sila sang mga tropa nga Hezbollah. Lakip sa hungod kag pasulit-sulit nga gin-atake sang mga tropa sang Israel ang kampo sang United Nations Interim Force in Lebanon ukon UNIFIL. Nagagamit ang Israel sang ginadumulian nga mga cluster bomb kag white phosphorus para sigurohon nga malaparan kag brutal ang epekto sang mga bomba sini sa mga sibilyan.

Samtang, ginatinguhaan sang mga pwersang Hezbollah ang pagpangapin sa ila soberanya kag pumuluyo. Ginatos ka hangaway sini ang nag-atubang sa 70,000 ka tropa, mga tangke kag pagpamomba sa kahawaan nga gingamit sang Israel sa pagtinguha nga sudlon ang sur nga bahin sang Lebanon sugod Septyembre 30. Nakatuga sang mabug-at nga bira ang Hezbollah sa naga-abante nga mga tropa, subong man sa mga kampo kag pwesto militar sa lain-lain nga bahin sang Israel. Pareho sang mga pwersa sang Hamas sa Palestine, handa ang Hezbollah sa madugay kag maduguon nga gyera sang atrisyon batuk sa mga pwersang manogsakop sang US-Israel.

Sa report sang militar sang Lebanon, indi magnubo sa siyam ka tangke nga nagtilaw nga magsulod sa pungsod ang napalupok sang mga pwersa sini halin Oktobre 1. Yara sa 55 ka tropang Israeli ang napatay, kag masobra 500 ang napilasan. Napalupok man sini ang duha ka Hermes 450 nga drone samtang nagalupad pasulod sa Lebanon.

Adlaw-adlaw, kag halos kada oras, nagapalupad sang puluan ka rocket ang Hezbollah nga nagatarget sa mga kampo kag pusisyon militar para himuon nga inutil ang gintawag nga Iron Dome, ang sistemang pangdepensa sang Israel nga lubos ginapondohan sang US. Madamo sa mga rocket sang Hezbollah ang naga-igo sa ila nga mga target. Sadtong Oktobre 13, madinalag-on ang isa ka drone strike sini sa isa ka kampo militar sa Haifa kon diin apat ka soldadong Israeli ang napatay kag 67 ang napilasan. Ang mga atake nga ini ang kapareho sang mga atake nga misayl sang Iraq sadtong Oktobre 1 nga nag-igo sa hedkwarters sang Mossad, ahensyang panilag sang Israel sa tunga sang Tel Aviv. Indi pareho sang Israel, bugtong nga mga lehitimo nga target militar ang ginaatake sang Lebanon kag sang Iran.