Pagkatapos pwersahon ang mga drayber kag opereytor sang dyip sa Baguio City kag kasikbit sini nga mga banwa nga ikonsolida ang ila mga prangkisa, lubos subong nga ginaduso sang lokal nga gubyerno diri ang jeepney phaseout paagi sa pagkakas sa ila nga mga ruta.

Sa report sang lokal nga sanga sang Piston, yara sa 96% sang mga lisensyado nga dyip ang nagpaidalom sa konsolidasyon tungod sa pagpamahog sang LTFRB-Cordillera Autonomous Region nga igakanselar ang indibidwal nila nga mga prangkisa.

“Madamo ang napresyur kag napilitan nga magpaidalom sa proseso,” suno kay Carlito Wayas, presidente sang Piston Metro Baguio. Sadto pa man, supak na ang mga drayber diri sa peke nga modernisasyon.

Labi nga nangin maathag ang katuyuan sang jeepney phaseout sang ginpagwa sang syudad ang Ordinance No. 22 ukon ang Route Rationalization Plan nga naga-unod sang plano nga buhinan ang mga ruta sang nagapamasada nga mga dyip, bisan pa sang mga konsolidado. Halin sa daan nga 46, ginhimo nga 31 na lang. Ang 29 diri ang “rationalized” ukon ginsugpon ukon gintingob na nga mga ruta, samtang ang duha ang bag-o nga ruta nga magalibot sa mga lugar pangturista.

Resulta sini, maganubo ang isip sang pwede makapasada nga dyip, halin 2,164 nga yunit padulong 1,544 na lang. Masobra 2,000 ka drayber kag ila nga mga pamilya ang mawad-an sang palangabuhian. Pamangkot sang mga komyuter, nga-a magbuhin sang tubtob 620 ka dyip kon nagadako ang kinahanglanon para sa pangpubliko nga transportasyon?

Sa subong may yara lang isa ka dyip para sa 169 ka pasahero kada adlaw. Sa idalom sang ordinansa, mangin isa kada 237 pasahero ini. “Lauman nga magalala pa ang kakulangan nga ini tuga sang padayon nga nagadako nga populasyon sa Baguio, mga residente man kag mga bisita,” suno sa ila.

Sigurado nga magaresulta man sa pagkalibog para sa mga komyuter, subong man sang kinagamo sa mga drayber nga may yara sang nagasinampaw (overlapping) nga mga ruta. Magluwas sa mga drayber kag opereytor, apektado man ang mga kantina, vulcanizing shop kag mga dispatser nga nagasalig sa mga operasyon sang dyip.

Sadtong Septyembre, nagpasa sang pagpamatok sa pagbag-o sang ruta ang mga drayber kag opereytor sa idalom sang Baguio-Benguet Movement Against Jeepney Phaseout (BBMAJPO) kag Piston Metro Baguio. Ginbatikos nila ang ordinansa nga ginpagwa nga wala sang konsultasyon. Dismayado ang mga drayber sa kawad-on sang interes sang ahensya sang lokal nga gubyerno sa ila nga mga reklamo. Wala gani ginbaton sang mga upisyal ang mga dokumento nga naga-unod sang ila panindugan batuk sa pagbuhin sang ruta.