Iti tengnga ti panagrambak iti paskwa, awan-sarday ti panagatake dagiti yunit ti Armed Forces of the Philippines (AFP) iti umili a Pilipino. Kadagiti maudi nga al-aldaw ti Disyembre 2024, awan-ressat dagiti kaso ti pammapatay, panagaresto ken panaglabsing dagiti berdugo iti internasyunal a makatao a linteg.

Pammapatay. Pinaltogan ken pinatay dagiti soldado ti AFP a nakaistasyon iti Barangay Paguihaman, Uson, Masbate ti dua a barito nga agaw-awid laeng manipud iti Christmas party iti nasao a barangay idi parbangon ti Disyembre 27, 2024. Dagus a pimmusay ti 18-anyos a ni Redjan Montealegre, residente ti kaabay a Barangay Mongahay, ken ti 14-anyos a ni JP Osabel, residente ti Barangay Mabini. Agpada da a pinaltogan iti ulo dagiti soldado.

Inamin mismo dagiti solddo ti pammapatay iti dua. Kunada, inpagarup da a dagiti biktima ket dagiti armado a mannakigubat ti NPA.

Panagaresto. Tallo a mangmangged iti panagdur-as nga addaan pakainaigan iti Paghida-et sa Kauswagan Development Group Incorporated (PDG Inc) ti inaresto dagiti pulis idi Enero 2 idiay Negros Occidental. Da Federico Salvilla, Perla Jaleco ken Dharyll Albanez ket naaresto kadagiti kaso ti “terrorism financing” wenno panaglabsing iti Terrorism Financing and Suppression Act of 2012.

Ti PDG Inc ket maysa nga organisasyon iti sentral ken abagatan a paset ti Negros Island a mangitantandudo iti karbengan dagiti mannalon ken mangngalap para iti sustenable nga agrikultura ken reporma iti gimong.

Panaglabsing iti internasyunal a makatao a linteg. Idi Oktubre 31, 2024, sibibiag a kinemmeg ti 12th IB ni Alvin Panoy (Ka Benmar) iti napasamak nga engkwentro idiay Sityo Hilwan, Barangay Manika, Libacao, Aklan. Ingalut isuna dagiti soldado ken simmaruno a nagpukkaw dagitoy ti “advance happy new year” ken nagibulos ti agsasaruno a putok ti paltog. Kinarit pay dagiti soldado a subboten dagiti Nalabbaga a mannakigubat ti bangkay manipud kadakuada.

Idi Disyembre 10, 2024, tinadtad ti bala ti 12th IB ti bangkay ni Jyrel Katipunan (Ka Jason) a napatay iti maysa nga engkwentro idi Disyembre 9 iti Barangay Tacayan, Tapaz, Capiz. Segun iti NPA, maysa laeng a tama ti bala iti bagi na ti linak-am ni Ka Jason a dagus nga inpatay na. Inpaidda da ti bangkay iti maysa a nasulinek a lugar, tapno ipaala kadagiti kapamilya na ngem natakwatan daytoy dagiti pasista a soldado iti sumaruno nga aldaw.

Idiay Oriental Mindoro, mano nga aldaw a linipit ken pinarigat ti 4th IB ti pamilya ti Nalabbaga a mannakigubat a namartir a ni Marife Gayadan, maysa a Mangyan-Iraya, manipud idi rinugianda nga alaen ti bangkay ti kapamilya da. Namartir ni Gayadan iti maysa nga engkwentro ti 4th IB ken New People’s Army (NPA) iti Sitio Tinis-an, Barangay San Vicente, Roxas, Oriental Mindoro idi Disyembre 18, 2024. Kamaudianna, intakas dagiti soldado ti bangkay ti martir ken dagiti kapamilya na tapno “iyawid” iti balay da. Agingga iti punpon ket binantayan isuda dagiti soldado.

Demolisyon. Naranggas a dinemolis dagiti mabaybayadan a maton ti nasurok 100 a kabalbalayan idiay Dalat, San Roque, Bangkal, Davao City idi Disyembre 21, 2024. Segun iti Kalipunan ng Damayang Mahihirap (Kadamay)-Davao, tallo a residente ti nadunor iti naranggas a panagduprak kadagiti balbalay iti komunidad. Dagiti tauhan ti demolisyon ket agtaud iti lokal a gubyerno.

Panaglipit. Pinaliiw ken linipit dagiti tauhan ti National Task Force (NTF)-Elcac ti kabuklan a kalihim ti Gabriela-Southern Tagalog a ni Krizia Cirujan idi panawen ti paskwa. Napan ti dua a lallaki a nagkedked nga agpakaammo iti balay ti pamilya ni Cirujano idiay Dasmariñas City, Cavite idi Disyembre 19, 2024.

Atake iti unyon. Iligal nga inikkat ti kapitalista ti Paperland Inc. ti presidente ti unyon ditoy a Militanteng Manggagawa ng Paperland Inc. (MMPI-ANGLO-KMU) idi Disyembre 22, 2024. Naikkat iti trabaho ni Renato Ayroso gapu iti panagtakder na iti collective bargaining agreement (CBA) da ken dadduma pay a karbengan ti mangmangged. Inaramat ti kapitalista a kaso laban ken Ayroso ti “insubordination” wenno saan a panagsurot iti mandar ti awtoridad. Ni Ayroso ket nabayagen a pagbabaraan da gapu iti panaglaban na iti CBA, Occupational Safety and Health (OSH) inspeksyon ken dadduma pay a karbengan dagiti mangmangged.