Ha butnga han pagselebrar han kapaskuhan, waray wantas an pangatake han mga yunit han Armed Forces of the Philippines (AFP) ha katawhan Pilipino. Hadton urhi nga mga adlaw han Disyembre 2024, waray hunong an mga kaso han panmatay, pangaresto ngan pagtalapas ha internasyunal nga tawhanon nga balaud han mga berdugo.

Panmatay. Ginpusil ngan ginpatay han mga sundalo han AFP nga naka-istasyon ha Barangay Paguihaman, Uson, Masbate an duha nga ulitawuhay nga tiuli tikang ha usa Christmas party ha nasering nga barangay hadton kaagahon han Disyembre 27, 2024. Namatay ha gilayon an 18-anyos nga hi Redjan Montealegre, residente han kasapit nga Barangay Mongahay, ngan 14-anyos nga hi JP Osabel, residente han Barangay Mabini. Ngaduha hira ginpusil ha ulo.

Gin-ako mismo han mga sundalo an pagpatay ha duha. Sigon ha ira, kahuna nira mga armado nga mangaraway han BHB an mga biktima.

Pangaresto. Tulo nga trabahador pankauswagan nga may sumpay ha Paghida-et sa Kauswagan Development Group Incorporated (PDG Inc) an gin-aresto han mga pulis hadton Enero 2 ha Negros Occidental. Gin-aresto hira Federico Salvillla, Perla Jaleco ngan Dharyll Albanez ha mga kaso han “terrorism financing” o pagtalapas ha Terrorism Financing and Suppression Act of 2012.

An PDG Inc usa nga organisasyon ha sentral ngan sur nga dapit han Negros Island nga nagpapasulong han katungod han mga parag-uma ngan mga parupangisda para ha sustenable nga agrikultura ngan pankatilingban nga reporma.

Pagtalapas ha internasyunal nga tawhanon nga balaud. Hadton Oktubre 1, 2024 buhi nga gindakop han 12th IB hi Alvin Panoy (Ka Benmar) ha nahitabo nga engkwentro ha Sityo Hilwan, Barangay Manika, Libacao, Aklan. Iginhigot hiya han mga sundalo ngan kasunod an pagguliat hin “advance happy new year” ngan nagbuhi hin susrunod nga buto han pusil. Gin-ayat pa han mga sundalo nga kuhaon an patay nga lawas han Pula nga mangaraway tikang ha ira.

Hadton Disyembre 10, 2024, gintadtad han bala han 12th IB an patay nga lawas ni Jyrel Katipunan (Ka Jason) nga napatay ha usa nga engkwentro hadton Disyembre 9 ha Barangay Tacayan, Tapaz, Capiz. Sigon ha BHB, usa la an igo ni Ka Jason nga ikinamatay niya dayon. Iginpahimutang nira an patay nga lawas ha usa nga tay-aw nga lugar agud ipakuha ha mga kaurupdan kundi natad-an ini han mga pasista nga sundalo han sumunod nga adlaw.

Ha Oriental Mindoro, pira kaadlaw nga ginpugos ngan ginpakurian han 4th IB an pamilya han namartir nga Pula nga mangaraway nga hi Marife Gayadan, usa nga Mangyan-Iraya, tikang han bawion an minatay han kaurupdan. Namartir hi Gayadan ha usa nga engkwentro han 4th IB ngan Bagong Hukbong Bayan (BHB) ha Sitio Tinis-an, Barangay San Vicente, Roxas, Oriental Mindoro hadton Disyembre 18, 2024. Ha katapusan, ginkawat han mga sundalo an patay nga lawas han martir ha iya mga kaurupdan para “ibalik” ha ira balay. Tubtub ha lamay, ginbabantayan hira han mga sundalo.

Demolisyon. Madarahug nga gindemolis han masobra 100 nga ginbaydan nga maton an mga panimalay ha Dalat, San Roque, Bangkal, Davao City hadton Disyembre 21, 2024. Segun ha Kalipunan ng Damayang Mahihirap (Kadamay)-Davao, tulo nga residente an nasamaran ha madarahug nga pagruba ha mga balay ha komunidad. Tikang ha lokal nga gubyerno an mga tawuhan han demolisyon.

Pan-gigipit. Ginmanmanan ngan gin-gipit han mga tawuhan han National Task Force (NTF)-Elcac an pankabug-usan nga sekretaryo han Gabriela-Southern Tagalog nga hi Krizia Cirujano hadton panahon han kapaskuhan. Ginkadto han duha nga lalaki nga diniri nga magpakilala an balay han pamilya ni Cirujano ha Dasmariñas City, Cavite hadton Disyembre 19, 2024.

Atake ha unyon. Iligal nga gintanggal han kapitalista han Paperland Inc. an presidente han unyon hini nga Militanteng Manggagawa ng Paperland Inc (MMPI-ANGLO-KMU) hadton Disyembre 22, 2024. Gintanggal ha trabaho hi Renato Ayroso tungod ha iya pagtindog ha collective bargaining agreement (CBA) ngan iba pa nga mga katungod han trabahador. Gin-gamit nga kaso han kapitalista kontra kan Ayroso an “insubordination” o diri pagsunod ha mando han otoridad. Maiha na nga gin-gigipit hi Aryoso tungod han iya pag-ato para ha CBA, Occupational Safety and Health (OSH) inspeksyon ngan iba pa nga katungod han mga trabahador.