Taliwala sa pagsaulog sa kapaskuhan, walay hunong ang pag-atake sa mga yunit sa Armed Forces of the Philippines (AFP) sa mga Pilipino. Niadtong katapusang mga adlaw sa Disyembre 2024, walay hunong ang mga kaso sa pagpatay, pag-aresto, ug paglapas sa internasyunal nga makitawhanong balaod nga gihimo sa mga berdugo.

Pagpatay. Gipusil patay sa mga sundalo sa AFP nga naka-istasyon sa Barangay Paguihaman, Uson, Masbate ang duha ka batan-on nga pauli na unta gikan sa usa ka Christmas party niadtong kaadlawon sa Disyembre 27, 2024. Namatay gilayon ang 18-anyos nga si Redjan Montealegre, residente sa kasikbit nga Barangay Mongahay, ug 14-anyos nga si JP Osabel, residente sa Barangay Mabini. Pareho silang gipusil sa ulo.

Gikumpirma mismo sa mga sundalo ang pagpatay sa duha. Matud nila, naalaan nilang mga manggugubat sa BHB ang mga biktima.

Pag-aresto. Tulo ka mamumuong pangkalambuan nga may kalabutan sa Paghida-et sa Kauswagan Development Group Incorporated (PDG Inc) ang giaresto sa mga pulis niadtong Enero 2 sa Negros Occidental. Giaresto tungod sa mga kaso sa “terrorism financing” o paglapas sa Terrorism Financing and Suppression Act of 2012 silang Federico Salvilla, Perla Jaleco ug Dharyll Albanez.

Ang PDG Inc usa ka organisasyon sa sentral ug habagatang bahin sa Negros Island nga nanalipud sa karapatan sa mga mag-uuma ug mga mangingisda alang sa sustenableng agrikultura ug katilingbanong reporma.

Paglapas sa internasyunal nga makitawhanong balaod. Niadtong Oktubre 31, 2024, buhi nga nadakpan si Alvin Panoy (Ka Benmar) sa 12th IB atol sa engkwentro sa Sityo Hilwan, Barangay Manika, Libacao, Aklan. Gigapos siya sa mga sundalo ug kasunod niini misinggit sila og “advance happy new year” samtang sunud-sunod nga nagpabuto og pusil. Nanghagit pa ang mga sundalo nga bawion ang patayng lawas sa Pulang manggugubat gikan kanila.

Niadtong Disyembre 10, 2024, gitadtad sa bala sa 12th IB ang patayng lawas ni Jyrel Katipunan (Ka Jason) nga napatay sa usa ka engkwentro niadtong Disyembre 9 sa Barangay Tacayan, Tapaz, Capiz. Sumala sa BHB, usa ka samad pinusilan lamang ang nahiagum ni Ka Jason nga nagresulta dayon sa iyang kamatayon. Gibutang nila ang patayng lawas sa usa ka hilit nga lugar aron ipakuha kini sa iyang mga paryente apan nadiskubre kini sa mga pasistang sundalo niadtong misunod adlaw.

Sa Oriental Mindoro, pipila ka adlaw nga gipig-ot ug gipaantus sa 4th IB ang pamilya sa namartir nga Pulang manggugubat nga si Marife Gayadan, usa ka Mangyan-Iraya, sukad nga gisugdan nilang bawion ang patayng lawas niini. Namartir si Gayadan sa usa ka engkwentro tali sa 4th IB ug Bagong Hukbong Bayan (BHB) sa Sitio Tinis-an, Barangay San Vicente, Roxas, Oriental Mindoro niadtong Disyembre 18, 2024. Sa katapusan, gisibat sa sundalo ang patayng lawas ni Gayadan ug ang iyang pamilya aron “iuli” unta kini ngadto sa ilang balay. Hangtud sa lubong gitiktikan sila sa mga sundalo.

Demolisyon. Bangis nga gidemolis sa kapin 100 ka bayarang maton ang mga balay sa Dalat, San Roque, Bangkal, Davao City niadtong Disyembre 21, 2024. Sumala sa Kalipunan ng Damayang Mahihirap (Kadamay)-Davao, tulo ka residente ang nasamdan tungod niining bangis nga demolisyon. Ang mga nangdemolis mga ginsakpan sa lokal nga gubyerno.

Pagpamig-ot. Gisubaybayan ug gipig-ot ang kinatibuk-ang kalihim sa Gabriela-Southern Tagalog nga si Krizia Cirujano niadtong panahon sa kapaskuhan. Gibisita siya sa duha ka lalaki nga wala magpaila sa iyang balay sa Dasmariñas City, Cavite niadtong Disyembre 19, 2024.

Atake sa unyon. Iligal nga gitangtang sa kapitalista sa Paperland Inc ang presidente sa Militanteng Manggagawa ng Paperland Inc. (MMPI-ANGLO-KMU) nga si Renato Ayroso niadtong Disyembre 22, 2024. Gisipa siya tungod kay nagbarog siya alang collective bargaining agreement (CBA) ug uban pang mga katungod sa mga mamumuo. Gigamit nga kaso sa kapitalista batok kang Ayroso ang “insubordination” o dili pagsunod sa mando sa awtoridad. Dugay na siyang giinitan tungod sa aktibo niyang pagduso sa CBA ug Occupational Safety and Health (OSH) inspeksyon ug uban pang katungod alang sa mga mamumuo.