Saan a malapdan dagiti rehas a landok ken kampanya iti panagikuspil ti rehimen Marcos ti agtultuloy a panagrubrob ti kapanunotan a patriyotiko ken dangadang dagiti balud pulitikal iti Pilipinas. Nainkalintegan laeng a sungbatan daytoy ti umili a Pilipino iti saan nga agkupas a suporta ken pannakikaykaysa.

Dagiti balud pulitikal ket biktima ti awan-sarday a kontra-rebolusyonaryo a gubat nga isaysayangkat ti reaksyunaryo nga estado. Isuda ket natiliw ken naibalud gapu iti pannakilaban da para iti interes ti masa nga anakling-et. Isuda ket naidarum kadagiti kaso a kriminal tapno ilibak a pulitikal dagiti kaso da. Ti agtultuloy a pannakabalud da ket labsing kadagiti karbengan a sibil dagiti balud pulitikal.

Iti listaan ti Karapatan, saan a bumaba iti 757 ti agdama a bilang dagiti balud pulitikal iti pagilyan. Adda ti 103 a natataengan ken 97 ti agsakit. Dimmanon iti 156 ti babbai ken adda ti 17 a konsultant ken istap iti saritaan iti kapya ti National Democratic Front of the Philippines (NDFP) ti nakabalud. Iti sidong ti rehimen Marcos, naaresto ken naibalud ti saan a bumaba iti 148 a balud pulitikal.

Nakaro ti kasasaad a mapadpadasan dagiti balud pulitikal ken kadawyan a balud a Pilipino iti uneg dagiti pagbaludan, Magudwa iti dua dagiti balud: 117,850 a balud a maipaspasidong iti panagusig ti korte bayat a nakabalud kadagiti pagbaludan ti Bureau of Jail Management and Penology ken ti 53,397 a balud a nakednganen ken nakabalud kadagiti pagbaludan ti Bureau of Corrections.

Kangrunaan a parikut da ti nabuntog a panaggunay ti hustisya iti pagilyan. Agresresulta daytoy iti nakail-ilet a pagbaludan. Agsagsagaba da iti kurang ken saan a nasustansya a taraon iti pagbaludan, nababa a kalidad ti serbisyo a medikal ken nalabes a panagirut kadagiti bisita da.

Agpapaut iti tawen wenno mano a dekada dagiti panagusig. Makaruk-at ti dadduma kalpasan a maabswelto ngem naibaluden iti adu a tawen. Iti kaso dagiti balud pulitikal, adda dagiti maab-abswelto iti orihinal a kaso, ngem saan a narukruk-atan gapu iti panagiyuli ti “agtutuon a kaso” ti militar. Iti sidong ti rehimen Marcos, dumanonen iti walo a balud pulitikal ti natay iti sakit ken kinalakay bayat nga adda 12 iti panawen ti rehimen Duterte. Adda met dagiti ulat a ngumatngato ti bilang dagiti balud a Pilipino a mangketkettel ti bukod da a biag gapu iti kinaawan ti namnama.

Pannakikaykaysa ken suporta

Manipud maikadwa a gudwa ti 2024, rimmegta ken nagbwelo dagiti kampanya dagiti nailyan-demokratiko a grupo ken dagiti salaknib ti karbengan-tao tapno suportaran ken ruk-atan dagiti balud-pulitikal. Naisayangkat ti baro a kampanya idi Hunyo 27, 2024 iti Bantayog ng mga Bayani idiay Quezon City iti panangiyuna ti Samahan ng Ex-Detainees Laban sa Detensyon at Aresto ken 13 pay nga organisasyon.

Kabinnadang ti grupo a Kapatid, ti timpuyog dagiti kakabagyan dagiti balud pulitikal ken dagiti boluntir, naiyaramid ti serye dagiti panagbisita ken panangited ti suporta dagiti balud pulitikal nangruna idi Disyembre 2024. Nagitulod da ti suporta a materyal kas panagrambak iti paskwa ken suporta a moral tapno papigsaen ti pakinakem dagiti balud pulitikal.

Naiyaramid dagiti panagbisita kadagiti pagbaludan iti Taguig City, Mandaluyong City, Quezon City, Muntinlupa City, Nueva Ecija, Pampanga, Tacloban City ken dadduma pay a lugar. Napan kadagiti pagbaludan dagiti tao ti simbaan, dagiti mangmangged iti salun-at, kabataan-estudyante ken dadduma pay a sektor. Adda met ti naisayangkat a panagkulekta kadagiti surat ken donasyon ti nadumaduma nga organisasyon, uray dagiti timpuyog ti migrante a Pilipino ken gangannaet.

Kalatakan kadagiti panagbisita ti panagrambak ti misa, maikadwa a daras para iti 2024, ti baro a nadutokan a kardinal a ni Cardinal Pablo Virgilio David idi Disyembre 26, 2024 idiay Camp Bagong Diwa, Bicutan, Taguig City. Karaman kadagiti nakapulapol ti kardinal dagiti detenido a konsultant iti kapya ti NDFP. Nagmisa met idiay Bago City District Jail idiay Negros Occidental idi Disyembre 30, 2024 ni San Carlos Bishop Gerardo Alminaza.

Inpanawagan ti dua a lider ti simbaan ti madagdagus a pannakawayawaya dagiti balud-pulitikal. Nagpanawagan da met iti gubyerno nga agipasa ti maysa a linteg a mangted ti nainkalintegan a danyos wenno kumpensasyon kadagiti balud a nabayag a naibalud nga inabswelto met laeng ti korte.

Kadagitoy amin nga aktibidad, inpakita dagiti balud pulitikal ti saan nga agkupas a takder ken pakinakem da para iti nailyan ken demokratiko a tarigagay ti umili.