Nagisayangkat kadagiti aktibidad ti nadumaduma a yunit ti New People’s Army (NPA) ken rebolusyonaryo a masa agpada iti kaaw-awayan, kadagiti il-ili ken kasyudadan iti pagilyan tapno rambakan ti maika-56 anibersaryo ti Communist Party of the Philippines (CPP).

Idiay Manila, nagisayangkat ti apagdarikmat a rali (lightning rally) dagiti alyado nga organisasyon ti National Democratic Front (NDF)-Metro Manila idi Disyembre 23, 2024 idiay Recto Avenue tapno itag-ay ti anibersaryo ti CPP. Iti martsa, nagpanawagan da iti umili a Pilipino nga iyabante ti nailyan-demokratiko a rebolusyon iti tengnga ti kumarkaro a kinarigat ken umir-irteng a susik iti pulitika ti agar-ari a dasig.

Idiay Rizal, insayangkat ti NDF-Rizal ti Oplan-Sabit ket Oplan-Dikit iti panagrugi ti 2025. Tampok dagiti namaris ken makaawis iti imatang a balatengga a nagrambak iti anibersaryo ti Partido a naisab-it kadagiti natao a sentro ti Antipolo City. Inkasa da met ti aduan a panagisab-it kadagiti istiker ken nagibunong da ti polyeto panggep iti NPA.

Indanon met ti nailyan a pamunuan ti Compatriots, Katipunan ng mga Gurong Makabayan ken Makabayang Kilusan ng Bagong Kababaihan ti kablaaw da iti Partido. Manipud met kadagiti internasyunal a partido ken gagayyem ti CPP, nagiyebkasen ti kablaaw ti Communist Party of Australia (Marxist-Leninist), “Serve the People” (Vietnam), Anti-Imperialist Action Ireland, Communist Party of Canada (Marxist-Leninist), Friends of the Filipino People in Struggle ken dagiti balangay daytoy iti nadumaduma a paset ti lubong.