Idi umuna a lawas ti Disyembre 2024, napardas a naduprak ti gubyerno ti Syria ken napatalsik ti presidente daytoy a ni Bashar al-Assad, kalpasan a rimmaut ti kumbinasyon dagiti jihadista ken dagiti grupo a suportado, inarmasan ken koordinado ti US, Turkey, Israel ken uray ti UK.

Kangrunaan kadagiti grupo nga immatake ket ti Hey’etu Tahrîri’ş-Şâm (HTS wenno Damascus Liberation Movement), a nagtaud iti naduprak a grupo ti ISIS. Tinudingan daytoy a “terorista” ti gubyerno a US ngem umaw-awat ti ayuda manipud iti UK nga alyado ti US iti NATO. Karaman met kadagiti rimmaut ti Syrian National Army, a direkta a suportado ti Turkey, ken ti Free Syrian Army (wenno Revolutionary Commando Army) a direkta a supsuportaran ti militar ti US a nakabase asideg iti nagbeddengan ti Syria iti Iraq ken Jordan.

Iti unos ti 10 aldaw laeng, dinanon ti HTS ti Damascus, kabisera ti pagilyan, manipud iti kuta daytoy iti prubinsya ti Idlib iti amianan a laud a paset ti Syria. Ginasut a sibilyan ken dagiti soldado a Syrian ti pinatay dagiti pwersa daytoy iti naranggas a kampanya a sakupen ti Damascus. Napaspas a napugipog daytoy ti armada ti Syria.

Ti panangibagsak iti rehimen nga Assad ket paset ti umir-ireng nga inter-imperyalista a risiris iti intero a lubong, ken partikular iti Middle East. Resulta daytoy ti tuloy-tuloy a pannakibiang dagiti gangannaet a bileg iti Syria, nangruna ti imperyalismo a US iti balangkas ti tinudingan daytoy a Greater Middle East Initiative a narugian idi pay 2004. Paset ti pannakibiang ditoy ti US ti panag-armas iti nadumaduma a grupo manipud pay 2012 ken panangrubrob iti armado a susik iti pagilyan.

Apaman a bimmagsak ti gubyerno nga al-Assad, dagus a binigbig ti US ti HTS (a naitakder manipud iti tedda ti ISIS) ken inikkat daytoy ti birngas a “terorista,” ken inawagan a “moderato” ti dadaulo daytoy a ni Abu Mohammad al-Jolani, nga inikkan ti baro nga arwat iti imperyalista a midya. Makibibiang tatta ti Abu Mohammad al-Jolani, iti panangbukel ti baro a gubyerno iti Syria. Kabayatanna, gungundawayan ti Israel ti panagbagsak ni al-Assad ken dagus nga inokupar daytoy ti Golan Heights, kaniwas iti panangbigbig ti United Nations a paset daytoy ti Syria. Nagisayangkat met ti Israel kadagiti airstrike agingga iti Damascus tapno palawaen pay ti sakop daytoy a daga ti Syria.

Saan a mailimed a ti panangpabagsak iti gubyerno ti Syria ket paset ti panagpalawa ti US ken kapada na nga imperyalista iti armado a binnusor iti Middle East. Agtultuloy nga umar-arangkada ti henosidyo ti Israel iti Palestine ken ti nabanwar a panaglaban dagiti pwersa a Palestino, kasta met dagiti pwersa a Hezbollah ken umili a Lebanese laban ditoy.

Kagiddan ti panagraut idiay Damascus, inatake met dagiti pwersa nga HTS, kabinnadang ti Syrian National Army, ken suportado dagiti airstrike ti Turkey, dagiti pwersa a Kurdish ken rebolusyonaryo a pwersa iti awtonomo a rehiyon dagiti Kurd iti amianan a daya a paset ti Syria. Daytoy ti lugar nga Autonomous Administration of North and East Syria a mabigbig iti awag a Rojava.

Daytoy a lugar ket kangrunaan a nakapasidong iti (People’s Protection Unit) ken YPJ (milisya ti babbai) a paset ti Syrian Defense Forces. Masarakan met ditoy ti nadumaduma a rebolusyonaryo nga armado a grupo,kas ti sumagmamano a yunit ti TIKKO a Hukbo dagiti Mangmangged ken Mannalon ti Turkey (hukbo ti Partido Komunista ti Turkey-Marxista-Leninista wenno TKP-ML).

Segun iti KP-ML, saan a “rebolusyon ti umili” ti napasamak idiay Syria nu di ket panagraira ti “proyekto ti NATO” nga inyaramid dagiti operatiba ti US, UK, Turkey ken Israel. “Ti panagtaud ken panagdur-as dagiti Salafista a jihadist a grupo, nangruna ti HST nga immagaw ti turay iti Syria, ket direkta a resulta ti panangsanay ken panangpondo dagiti imperyalista ken dagiti reaksyunaryo nga estado iti rehiyon.” Iti panang-agaw ti turay ti HTS, a suportado ti US-Israel, NATO ken Turkey, sumangsango ti umili a Kurd, partikular dagiti babbai, ti dakkel a pangta ti panagsakop ken kinaranggas.

Rumbeng a tumakder dagiti pwersa nga anti-imperyalista ken rebolusyonaryo tapno suportaran ti umili ti Syria iti dangadang da para iti pudno a demokrasya ken nailyan a panagwaywayas. Iti panangpadisi ken al-Assad, ti Syria ket maipasidong iti dominasyon ken kontrol ti turay ti US-Israel ken Turkey, nga addaan gagem a kontrolen ti kabuklan ti Middle East ken ti nabaknang a rekurso iti langis.