Nagpanawagan ti Communist Party of the Philippines iti umili a Pilipino a nainget a babalawen ti panaglayag ti US Carrier Strike Group (CSG) One idiay Surigao Strait iti nagbaetan ti Leyte ken Mindanao idi maudi a lawas ti Disyembre 2024. Garapal ti inaramid daytoy a panagballasiw iti soberano a kabaybayan a sakop ti Pilipinas manipud Pacific Ocean agturong ti West Philippine Sea.

Ti pormasyon a nabal ti US, nga idadauluan ti USS Carl Vinson aircraft carrier, maysa a halimaw a panggubat nga addaan kabaelan nga agawit ti maysa a dakkel a nukleyar nga arsenal. Awit daytoy ti tallo pay a barko a panggubat.

Kabayatanna, bin-ig a panagpakaaso-aso iti imperyalista a US ti panangiyanunsyo ti AFP ken Department of National Defense nga agplanplano dagitoy a gumatang ti Typhon Mid-range Capability (MRC) missile system manipud iti US. Idi Abril 2024, nagipwesto ti US ti Typhon missile iti amianan a paset ti Luzon nga naaramat iti Balikatan war games. Saan pay laeng a naikkat daytoy.

Kasaruno daytoy, balbaliw nga induron ni Surigao del Norte 2nd District Rep. Robert Ace Barbers idi Enero 2 nga maaddan ti Enhanced Defense Cooperation Agreement site iti prubinsya na. Kunana, kasapulan daytoy iti prubinsya gapu ta “bulnerable ti daya a paset ti pagilyan kadagiti ismagler ken pannakibiang ti gangannaet.”

Segun ken Marco Valbuena, upisyal iti impormasyon ti Partido, kakaruan ti panagpakaaso-aso ni Marcos iti imperyalista nga amo na a US iti pannakikunsabos iti panangrabngis iti soberanya ti Pilipinas. “Ipakpakita daytoy nu kasano nga maar-aramat ti pagilyan a pangisayangkatan kadagiti operasyon ti US iti panangipakita iti pigsa na iti Pasipiko ken kas paspasurot iti ar-aramiden ti US a panangpairteng ti inter-imperyalista a tensyon,” kunana.