Sa tunga sang pagsaulog sang paskwa, wala-puas ang pagpang-atake sang mga yunit sang Armed Forces of the Philippines (AFP) sa pumuluyong Pilipino. Sadtong ulihi nga adlaw sang Disyembre 2024, nagapadayon ang mga kaso sang pagpatay, pag-aresto kag paglapas sa internasyunal nga makitawhanon nga laye ang mga berdugo.

Pagpatay. Gintiro kag ginpatay sang mga soldado sang AFP nga naka-istasyon sa Barangay Paguihaman, Uson, Masbate ang duha ka soltero nga papuli lang halin sa isa ka Christmas party sa nasambit nga barangay sadtong kaagahon sang Disyembre 27, 2024. Gilayon nga napatay ang 18-anyos nga si Redjan Montealegre, residente sang katupad nga Barangay Mongahay, kag 14-anyos nga si JP Osabel, residente sang Barangay Mabini. Pareho sila nga gintiro sa ulo.

Gin-ako mismo sang mga soldado ang pagpatay sa duha. Suno sa ila, nasal-an nila nga mga armado nga hangaway sang BHB ang mga biktima.

Pag-aresto. Tatlo ka mamumugon pangkauswagan nga may kaangtanan sa Paghida-et sa Kauswagan Development Group Incorporated (PDG Inc) ang gin-aresto sang mga pulis sadtong Enero 2 sa Negros Occidental. Sila ni Federico Salvilla, Perla Jaleco kag Daryll Albañez ang gin-aresto sa mga kaso sang “terrorism financing” ukon paglapas sa Terrorism Financing and Suppression Act of 2012.

Ang PDG Inc ang isa ka organisasyon sa sentral kag sur nga bahin sang Negros Island nga nagasulong sang kinamatarung sang mga mangunguma kag mga mangingisda para sa sustenable nga agrikultura kag repormang pangkatilingban.

Paglapas sa internasyunal nga makitawhanon nga laye. Sadtong Oktobre 31, 2024 buhi nga gindakop sang 12th IB si Alvin Panoy (Ka Benmar) sa nahitabo nga engkwentro sa Sityo Hilwan, Barangay Manika, Libacao, Aklan. Ginhigot siya sang mga soldado kag pagkatapos nagsinggit ang mga ini sang “advance happy new year” kag nagbuhi sang asud-asod nga lupok sang pusil. Ginhagyat pa sang mga soldado nga bawion ang bangkay sang Pulang hangaway halin sa ila.

Sadtong Disyembre 10, 2024, gintadtad sang bala sang 12th IB ang bangkay ni Jyrel Katipunan (Ka Jason) nga napatay sa isa ka engkwentro sadtong Disyembre 9 sa Barangay Tacayan, Tapaz, Capiz. Suno sa BHB, isa ka igo lang sang bala sa lawas ang naagum ni Ka Jason nga gilayon niya nga ginkamatay. Ginbutang nila ang bangkay sa isa ka sim-ong nga lugar, agud nga ipakuha sa iya nga mga himata apang nasapwan ini sang mga pasista nga soldado pagkasunod nga adlaw.

Sa Oriental Mindoro, pila ka adlaw na nga gina-ipit kag ginapabudlayan sang 4th IB ang pamilya sang Pulang hangaway nga namartir nga si Marife Gayadan, isa ka Mangyan-Iraya, halin sang sugod nila nga bawion ang bangkay sang himata. Namartir si Gayadan sa isa ka engkwentro sang 4th IB kag Bagong Hukbong Bayan (BHB) sa Sitio Tinis-an, Barangay San Vicente, Roxas, Oriental Mindoro sadtong Disyembre 18, 2024. Sa ulihi, ginpalagyo sang mga soldado ang bangkay sang martir kag iya mga himata para “ipauli” sa ila nga balay. Tubtob sa lubong ginabantayan sila sang mga soldado.

Demolisyon. Mapintas nga gindemolis sang masobra 100 ka binayran nga maton ang kabalayan sa Dalat, San Roque, Bangkal, Davao City sadtong Disyembre 21, 2024. Suno sa Kalipunan ng Damayanng Mahihirap (Kadamay)-Davao, tatlo ka residente ang napilasan sa mapintas nga pag-guba sa mga balay sa komunidad. Naghalin ang mga tinawo sang demolisyon sa lokal nga gubyerno.

Pagpang-ipit. Ginapanilagan kag gina-ipit sang mga tinawo sang National Task Force (NTF)-Elcac ang ila heneral nga sekretaryo sang Gabriela-Southern Tagalog nga si Krizia Cirujano sadtong panahon sang paskwa. Ginkadtuan sang duha ka lalaki nga nagpamalibad nga magpakilala ang balay sang pamilya Cirujano sa Dasmariñas City, Cavite sadtong Disyembre 19, 2024.

Atake sa unyon. Iligal nga ginkakas sang kapitalista sang Paperland Inc. ang presidente sang unyon diri nga Militanteng Manggagawa ng Paperland Inc. (MMPI-ANGLO-KMU) sadtong Disyembre 22, 2024. Ginkakas sa trabaho si Renato Ayroso tungod sa iya pagtindog para sa ila collective bargaining agreement (CBA) kag sa iban pa nga kinamatarung sang mamumugon. Gingamit nga kaso sang kapitalista batuk kay Ayroso ang “insubordination” ukon indi pagsunod sa sugo sang awtoridad. Madugay na nga gina-initan si Ayroso tungod sa iya pagpakigbato para sa CBA, Occupational Safety and Health (OSH) inspeksyon kag iban pa nga kinamatarung sang mga mamumugon.