Ikut ti saan a magungon a determinasyon, ken iti silaw ti panangidaulo ti Partido, sipipinget a dalyasaten ti nalawa a masa ti umili iti umay a tawen ti narigat a dana ti pannakidangadang tapno papigsaen ti panaglaban da iti korap, manangidadanes ken traydor iti pagilyan a rehimen US-Marcos.

Kumaro a kumaro ti kasasaad ti mayorya ti umili a Pilipino gapu kadagiti parigat ken padagsen a patakaran ken programa ti rehimen US-Marcos. Iti napalabas a tawen, ad-adda a nagsuwek ti panggimong a kasasaad ken pagbiagan ti umili. Gapu kadagiti patakaran a mangnamnama iti importasyon ken mangpatpatay iti lokal a produksyon, dandani awan ressat ti panagtayok ti presyo ti taraon, langis ken dagiti basaran a pagkasapulan, karaman ti paggastosan iti salun-at, edukasyon ken dadduma pay a serbisyo.

Agintutuleng ni Marcos iti pukkaw ti masa a mangmangged para iti nainkalintegan a sweldo a makabiag kadagiti pamilya da. Purpurwakan ni Marcos ti sinsilyo dagiti mangmangged bayat a nabnabsog dagiti gangannaet a dadakkel a kapitalista. Agsusumbangir ti panagkamkam dagiti apo’t daga ken dadakkel a plantasyon ken kumpanya iti minas iti daga dagiti mannalon.

Maag-agawan ti pagbiagan dagiti mangngalap, dagiti drayber ken opereytor ken dadduma pay a sektor ti masa nga anakling-et. Agkurkurang ti trabaho, nangruna para kadagiti agtutubo, iti ekonomya a saan nga industriyalisado. Nu anya la ditan ti serserken a pagsapulan ti minilyon a mangmangged ken mayorya dagiti pamilya nga agbibiag iti sangka-kur-ay sangka-tuktok. Rinibo ti inaldaw a mapupwersa nga agballasiw-taaw tapno makigasanggasat tapno makasapul bassit para kadagiti pamilya da.

Kumaro a kumaro ti saan a panagpapatas ken kinaawan hustisya iti gimong. Bayat a ti kaadwan ket lumablaban tapno agbiag iti tengnga ti kinarigat, tuloy-tuloy met nga agpappapas iti aglaplapusanan ken kinabarayuboy ni Marcos ken dagiti korap a burukrata na, dagiti pabpaboranna a kapitalista ken dadakkel nga apo’t daga. Ti pamilya a Marcos mismo ket agbibiag iti kinagarbo, masansan a panagruar iti pagilyan, dagiti pasken ken konsyerto idiay Malacañang, panagaramat ti helikopter para iti pribado a byahe ken dadduma pay. Agak-akup da ti dakdakkel pay a kinabaknang babaen ti korapsyon, dagiti kikbak, panaggundaway kadagiti mangmangged ken mannalon, ken panaggamrud iti natural a kinabaknang ti pagilyan.

Nangruna iti sango ti umay nga eleksyon, makumikom tatta ti agar-ari a bunggoy ni Marcos iti konsolidasyon ti turay tapno bukodan ti poder. Ar-aramaten na daytoy laban iti umili ken iti karibal na iti pulitika. Kugkugtaran na tatta dagiti Duterte nga inalyado na iti panagsaur iti eleksyon 2022. Nupay kasta, agintutuleng isuna iti arungaing ti umili nga ipaaresto ni Rodrigo Duterte ken padisien ni Sara Duterte tapno mapangngeddeng a madusa da iti nakaad-adu a krimen ti pammapatay ken panagtakaw iti kaban ti kinabaknang ti umili.

Awan-sarday ti brutal a gera iti panagikuspil ni Marcos. Kumaro pay ti terorismo ti estado tapno rebbeken ti dangadang ti umili. Iti linged dagiti deklarasyon nga “insurgency-free,” ipatpataw ni Marcos ti saan a deklarado a linteg militar iti rinibo a barangay iti kaaw-awayan a nairut a konkontrolen dagiti pasista nga babaunen na. Papaileten ni Marcos ti tay-ak ti ligal a dangadang. Iti kaaw-awayan man wenno kasyudadan, awan patengga ti sarbeylans, panaglipit, red-tagging, panag-aresto ken panagisampa kadagiti pinarbo a kaso laban iti masa a tumaktakder ken lumablaban para iti patriyotiko ken demokratiko nga interes ti umili.

Napeklan ti panagtraydor ni Marcos iti umili a Pilipino iti panagtamed na iti turay ti imperyalista nga amo. Iti sidong ti aso-aso a ni Marcos, saan a maartapan ti kinagarapal ti interbensyon a militar ti US. Bulsek a sursurotenna ti amin a pagayatan ti US, karaman ti panagitakder ti nayon pay a base militar ken sikreto a pasilidad. Ipaspasidong na ti reaksyunaryo nga armado a pwersa iti mandar ken kontrol dagiti upisyal militar ti US. Ipapausar ni Marcos ti pagilyan iti US iti panangpabara iti armado a binnusor da iti imperyalista a karibal na a China, karaman ti panaglayag dagiti higante nga armada ti US Navy iti uneg mismo ti arkipelago ti Pilipinas.

Iti umay a tawen ken panawen, kasapulan nga ad-adda a papigsaen ti nalawa a masa ti umili a Pilipino ti dangadang da laban iti aso-aso, parigat ken pasista a rehimen Marcos. Nasken nga ipan amin a pigsa a pandayen ti determinasyon ken kabaelan ti umili a bumangon ken agprotesta. Rumbeng nga ipamatmat da ti pungtot iti kinainutil daytoy nga ibaba ti presyo ti taraon ken dagiti gagatangen ken pannakapaay nga agparnuay ti regular a trabaho para iti minilyon a mangmangged. Kasapulan nga ilabanda ti demokratiko a kadawatan da para iti daga, nayon a sweldo ken tangdan, pagbiagan ken naan-anay a serbisyo a panggimong.

Sipipinget a patibkeren ti determinasyon ti umili a Pilipino tapno buraken ti terorista nga alyaw ti rehimen US-Marcos. Kasapulan a natured a labanan da ti pasismo ti estado

iti amin a pamuspusan. Ikkan boses ti amin a biktima dagiti pammapatay ken kinaranggas ti military iti kaaw-awayan ken kasyudadan. Urnongen ti pigsa da iti sangsangkamaysa a panagmartsa iti amin a paset ti pagilyan tapno ipukkaw ken ilaban ti hustisya. Nasken a tumakder ti intero nga umili para iti karbengan ken hustisya para iti amin a biktima.

Rumbeng nga ipamatmat ti umili ti patriyotiko a pungtot ken Marcos, papigsaen ti pukkaw tapno dupraken ti amin a base militar ti US, ikkaten ti amin nga armada a panggubat ti US nga iyim-imbak na ditoy Pilipinas, supyaten dagiti panagsanay iti gera ken pagtalawen ti amin a tropa nga Amerikano, pati dagiti tropa ti Japan nga iguyguyod ti US. Kasapulan nga ilaban ti umili ti pudno nga agwaywayas a patakaran a pangruar a mangitantandudo iti kapya ken dayalogo, partikular tapno risuten dagiti susik a pangbaybay iti China.

Determinado ti Partido a rimbawan dagiti pagkapuyan iti napalabas ken ingato ti kabaelan daytoy a nasaknap nga idauluan ti masa. Guyguyugoyen daytoy ti amin a kadre na ken ti rebolusyonaryo a masa nga ad-adda pay a pandayen ti determinasyon da a palawaen ken papigsaen ti Partido, ti New People’s Army ken dagiti rebolusyonaryo nga organisasyon ti masa, iyabante ti nailyan-demokratiko a rebolusyon ken ingge’t kabaelan a gun-oden dagiti balligi itatta a tawen ken iti sumangbay a panawen.